Aakhri rozay hain dil-e-ghamnak muztar-e-jaan hai
Hasrata wa hasrata ab chal diya Ramzan hai
Ashiqan-e-mah-e-Ramzan ro rahe hain phoot kar
Dil bada bechain hai afsurda rooh o jaan hai
Dard o riqqat se pacharain kha ke rota hai koi
To koi tasweer-e-gham ban kar khada hairan hai
Al-firaq aah al-firaq ae Rab ke mehman al-firaq
Al-wida ab chal diya to ae mah-e-Ramzan hai
Dastan-e-gham sunayein kis ko ja kar aah! hum
Ya Rasoolallah! dekho chal diya Ramzan hai
Khoob rota hai tadapta hai gham-e-Ramzan mein
Jo musalman qadr-dan o ashiq-e-Ramzan hai
Rotay rotay hichkiyan bandh jati hain ushaq ki
Tujh mein kaisa soz ae Allah ke mehman hai
Teri furqat mein tere ashiq ka dil tukray hua
Aur seena chaak tere hijr mein Ramzan hai
Waqt-e-iftar o sahar ki ronaqein hon gi kahan!
Chand din ke baad ye sara saman sunsan hai
Teri aamad se dil-e-pazmurda khul uthay magar
Jald tadpa kar hamein tu chal diya Ramzan hai
Haaye sad afsos! Ramzan ki na hum ne qadr ki
Be-sabab hi bakhsh de Ya Rabb ke Tu Rahman hai
Mah-e-Ramzan tujh mein jo rozay nahin rakhta koi
Woh bada mehroom hai badbakht hai nadan hai
Kar rahe hain tujh ko ro ro kar musalman al-wida
Aah! ab tu chand ghariyon ka faqat mehman hai
Rok saktay hi nahin haaye tujhay ab kya karein!
Sab ko rota chor kar tu chal diya Ramzan hai
Assalam ae mah-e-Ramzan tujh pe hon lakhon salam
Hijr mein ab tera har ashiq hua be-jaan hai
Chand aansu nazr hain bas aur kuch pallay nahin
Nekiyon se aah! ye khali mera daman hai
Wasta Ramzan ka Ya Rabb! hamein tu bakhsh de
Nekiyon ka apnay pallay kuch nahin saman hai
Dust basta iltija hai hum se razi ho ke ja
Bakhwana hashr mein haan tu meh-e-ghufran hai
Kash! aatay saal ho Attar ko Ramzan naseeb
Ya Nabi! meethay madinay mein bada arman hai