Bagh-e-Jannat ke hain bahr-e-madh-e-khwan-e-Ahl-e-Bait
Tum ko muzdah naar ka ae dushmanan-e-Ahl-e-Bait
Kis zaban se ho bayan iz-o-shan-e-Ahl-e-Bait
Madh-goy-e-Mustafa hai madh-khwan-e-Ahl-e-Bait
Un ki paki ka Khudaye-Pak karta hai bayan
Ayat-e-Tat-heer se zahir hai shan-e-Ahl-e-Bait
Mustafa izzat badhane ke liye tazeem dein
Hai buland iqbal tera doodman-e-Ahl-e-Bait
Un ke ghar mein be-ijazat Jibraeel aate nahi
Qadar wale jante hain qadar-o-shan-e-Ahl-e-Bait
Mustafa baye kharidar us ka Allah mushtari
Khoob chandi kar raha hai karwan-e-Ahl-e-Bait
Razm ka maidan bana hai jalwagah-e-husn-o-ishq
Karbala mein ho raha hai imtihan-e-Ahl-e-Bait
Phool zakhmon ke khilaye hain haway-e-dost ne
Khoon se seencha gaya hai gulistan-e-Ahl-e-Bait
Hoorein karti hai aroosan-e-shahadat ka singaar
Khubru dulha bana hai har jawan-e-Ahl-e-Bait
Ho gayi tehqeeq eid-e-deed-e-aab-e-tegh se
Apne rozay kholte hain saaiman-e-Ahl-e-Bait
Jumma ka din hai zeest ki tay kar ke aaj
Khelte hain jaan par shahzadgan-e-Ahl-e-Bait
Ae shabab-e-fasl-e-gul yeh chal gayi kaisi hawa
Kat raha hai lehlahata bostan-e-Ahl-e-Bait
Kis shaqi ki hai hukumat haye kya andher hai
Din dahade lut raha hai karwan-e-Ahl-e-Bait
Khushk ho ja khaak ho kar khaak mein mil ja Furaat
Khaak tujh par dekh to sookhi zaban-e-Ahl-e-Bait
Khaak par Abbas-o-Usman-e-alamdar hain
Bekasi ab kaun uthaye ga nishan-e-Ahl-e-Bait
Teri qudrat janwar tak aab se sairab hon
Pyaas ki shiddat mein tarpe be-zaban Ahle Bait
Qafila salar-e-manzil ko chale hain sonp kar
Warith-e-be-warithan ko karwan Ahle Bait
Fatima ke ladle ka aakhri deedar hai
Hashr ka hangama barpa hai miyan-e-Ahle Bait
Waqt-e-rukhsat keh raha hai khaak mein milta suhag
Lo salam-e-aakhri ae bewagan-e-Ahle Bait
Abr-e-fauj-e-dushmanan mein ae falak yun doob jaye
Fatima ka chand mehr-e-aasman Ahle Bait
Kis maze ki lazzatein hain aab-e-tegh-e-yar mein
Khaak-o-khoon mein laut te hain tishnagan-e-Ahle Bait
Bagh-e-jannat chhor kar aaye hain mehboob-e-Khuda
Ae zahe qismat tumhari kushtagan-e-Ahle Bait
Hoorain be-parda nikal aayen sar khole hue
Aaj kaisa hashr hai Ya-Rab miyan-e-Ahle Bait
Koi kyun poochay kisi ko kya gharz ae bekasi
Aaj kaisa hai mareez-e-neem-jaan Ahle Bait
Ghar lutana jaan dena koi tujh se seekh jaye
Jaan-e-alam ho fida ae khandan Ahle Bait
Sar-e-shaheedan-e-mohabbat ke hain nezon par buland
Aur oonchi Khuda ne qadar-o-shan-e-Ahle Bait
Daulat-e-deedar payi paak janain bech kar
Karbala mein khoob hi chamki dukan-e-Ahle Bait
Zakhm khanay ko to aab-e-tegh pee lenay ko diya
Khoob dawat ki bula kar dushmanan-e-Ahle Bait
Apna sauda bech kar bazaar sona kar gaye
Kaun si basti basayi tajran-e-Ahle Bait
Ahle Bait-e-paak se gustakhiyan be-bakiyan
La'natullahi Alaikum dushmanan-e-Ahle Bait
Be-adab gustakh firqa ko suna de ae Hasan
Yun kaha karte hain Sunni dastan-e-Ahle Bait