Bahut ranjeeda o ghamgeen hai dil Ya Rasool Allah
Karam kar do kali dil ki uthay khil Ya Rasool Allah
Balaon ne mujhe har samt se kuch aisa ghera hai
Mere barhte hi jate hain masail Ya Rasool Allah
Paye imdad apne sher-e-Hamza ko Shaha bhejo
Mere peeche para hai haye! qatil Ya Rasool Allah
Dil-e-maghmoom ka sab haal Aaqa tum pe zahir hai
Shahan! hoon marham-e-taskeen ka sail Ya Rasool Allah
Gham o aalam ka mara hoon Aaqa be-sahara hoon
Meri aasaan ho har ek mushkil Ya Rasool Allah
Tumhein deta hoon Maula wasta mein char yaron ka
Mere ho jayein tay mushkil marahil Ya Rasool Allah
Jo tu chahe to mere gham ki beri gir pare kat kar
Nahin tere liye koi mushkil Ya Rasool Allah
Musalman aah! ghafil ho gaye neki ki dawat se
Barha jata hai haye! zor-e-batil Ya Rasool Allah
Shahan mandla rahi hai maut sar par phir bhi mera nafs
Gunahon ki taraf har dam hai mail Ya Rasool Allah
Barha jata hai har dam aah! ghalba nafs o shetan ka
Yeh har neki mein ho jate hain hail Ya Rasool Allah
Gunahon ke sabhi amraz Aaqa door farma do
Sanwar jayein mere sab bad-khasail Ya Rasool Allah
Na London ki na Paris ki na America ki hai khwahish
Madina hi hamari to hai manzil Ya Rasool Allah
Shafa'at hashr mein farmao ge jab khush naseebon ki
Mujhe kar lena Aaqa un mein shamil Ya Rasool Allah
Karam kar do bajuz isyan nahin hai kuch bhi name mein
Ibadat hai na palle hain nawafil Ya Rasool Allah
Hamare zakhm haye gham Rasool-e-pak bhar jayein
Jigar ho tere gham mein kaash! ghayal Ya Rasool Allah
Kuch aisi aag ki laga do mere seene mein
Main tadpoon khoob tadpoon misl-e-bismil Ya Rasool Allah
Tere akhlaq par qurbaan tere ausaf par wari
Musalman kya adu bhi tera qail Ya Rasool Allah
Shahan jab khuld mein aap aage aage jayein is dam
Main bhi ho jaon peeche peeche dakhil Ya Rasool Allah
Abhi ban jaye bigri tere ek adna ishare se
Tere Attar ke hal hon masail Ya Rasool Allah