Dil dard se bismil ki tarah loot raha ho
Seena pe tasalli ko tera haath dhara ho
Kyun apni gali mein woh ravadar-e-sada ho
Jo bheek liye rah-e-gada dekh raha ho
Gar waqt-e-ajal sar teri chaukhat pe jhuka ho
Jitni ho qaza ek hi sajda mein ada ho
Hamsaya rehmat hai tera saya-e-deewar
Rutba se tanazzul kare to zill-e-huma ho
Mauqoof nahi subh-e-qayamat hi pe yeh arz
Jab aankh khule samne to jalwa numa ho
De is ko dam-e-naz'a agar hoor bhi saghar
Munh pher le jo tishna-e-deedar-e-tara ho
Firdous ke baghon se idhar mil nahi sakta
Jo koi madina ke biyaban mein guma ho
Dekha unhein mahshar mein to rehmat ne pukara
Azad hai jo aap ke daman se bandha ho
Aata hai faqiron pe unhein pyar kuch aisa
Khud bheek dein aur khud kahein mangta ka bhala ho
Veeran hon jab abad makan subh-e-qayamat
Ujra hua dil aap ke jalwon se basa ho
Dhoondha hi karein sadr-e-qayamat ke sipahi
Woh kis ko mile jo tere daman mein chupa ho
Jab dene ko bheek aaye sar-e-kuye-gadayan
Lab par yeh dua thi mere mangta ka bhala ho
Jhuk kar unhein milna hai har ek khaak nasheen se
Kis waste neecha na woh daman-e-qaba ho
Tum ko to ghulamon se hai kuch aisi mohabbat
Hai tark-e-adab warna kahein hum pe fida ho
De daliye apne lab-e-jan bakhsh ka sadqa
Ae chara-e-dil dard-e-Hasan ki bhi dawa ho
Bahar-e-Khuld sadqay ho rahi hai roo-e-ashiq par
Khuli jaati hain kaliyan dil ki teray muskurane se
Zameen thodi si de de bahr-e-madfan apnay kocha mein
Lagaday meray pyaray meri mitti bhi thikanay se
Palat-ta hai jo zair us se kehta hai naseeb us ka
Array ghafil qaza behtar hai yaan se phir ke janay se
Bula lo apnay dar par ab to hum khana badoshon ko
Phiren kab tak zaleel-o-khwar dar dar bhatkanay se
Na pohanchay un ke qadmon tak na kuch husn-e-amal hi hai
Hasan kya poochtay ho hum gaye guzray zamanay se