Dil mein ho yaad teri goshaye tanhai ho
Phir to khalwat mein ajab anjuman aarai ho
Aastana pe tere sar ho ajal aayi ho
Aur ae jaane jahan tu bhi tamashayi ho
Khak pamale gareebon ko na zinda kare
Jis ke daman ki hawa maseehayi ho
Us ki qismat pe fida takhte shahee ki rahat
Khake taiba pe jise chain ki neend aayi ho
Taj walon ki yeh khwahish hai ke un ke dar par
Hum ko hasil sharafe nasiya farsayi ho
Ik jhalak dekhne ki tab nahi aalam ko
Woh agar jalwa karein kaun tamashayi ho
Aaj jo aib kisi par nahi khulne dete
Kab woh chahenge meri hashr mein ruswayi ho
Kyun karein bazme shabistane jinan ki khwahish
Jalwaye yaar jo sham'e shabe tanhai ho
Khil'ate maghfirat us ke liye rehmat laye
Jis ne khake dare shah jaye kafan payi ho
Yehi manzoor tha qudrat ko ke saya na bane
Aise yakta ke liye aisi hi yaktayi ho
Zikre khudam nahi mujh ko bata dein dushman
Koi nemat bhi kisi aur se ghar payi ho
Jab uthe daste ajl se meri hasti ka hijab
Kash us parda ke andar teri zebayi ho
Dekhein jaan bakhshiye lab ko to kahein Khizr o Maseeh
Kyun mare koi agar aisi maseehayi ho
Kabhi aisa na hua un ke karam ke sadqe
Hath ke phailne se pehle na bheek aayi ho
Band jab khwabe ajl se hon husn ki aankhein
Us ki nazron mein tera jalwaye zebayi ho