Hajj ka paaye ga sharaf mera Bilal umeed hai
Gunbad-e-Khizra ki deed is ki bila shak eid hai
Marhaba! tum ko mubarak ho Madine ka safar
Fazl-e-Rab se tum pe nazil rehmatein hoon har dagar
Ya Khuda! aasaan ho is keliye Hajj ka safar
Zauq barhta hi rahe is ka Khudaye bahr-o-bar
Ronay wali aankh de aur chaak seena kar ata
Yarab! is ko ulfat-e-Shah-e-Madina kar ata
Zarray zarray ka adab Allah is ko ho naseeb
Saiyidi Ahmad Raza ka wasta Rab-e-Mujeeb!
Imtihan darpesh ho rah-e-Madina mein agar
Sabr kar tu sabr kar haan sabr kar bas sabr kar
Koi dhutkare ya jhaare balkay mare sabr kar
Mat jhagad, mat burbura, pa ajr-e-Rab se sabr kar
Rah-e-janan ka har ik kanta bhi goya phool hai
Jo koi shikwa kare uski yaqeenan bhool hai
Tum zaban ka aankh ka du-qufl-e-Madina lo laga
Warna barh sakta hai isyan ka wahan bhi silsila
Guftagu sadir na kuch bekar ho ehram mein
Lab pe bas Labbaik ki takrar ho ehram mein
Jab kare tu khana-e-Kaaba ka ro ro kar tawaf
Yeh dua karna Khuda mere gunah kar de muaf
Pyare haji! jab ho tera dakhla Arafat mein
Karna nadim ho ke tu aah o buka Arafat mein
Halat-e-ehram mein yaad-e-kafan ho qabr ho
Yad kar Arafat mein tu Hashr ke maidan ko
No ko jab Arafat mein haji ikhate hon sabhi
Bhool mat jana duao mein mujhe tu us ghari
Jis ghari karne lage qurban Mina mein janwar
Tu tasawwur hi mein apne nafs ko bhi zibah kar
Hazri ho jab Madine mein tumhari haji-o!
Ishq-e-Shah mein khoob karna aah o zari haji-o!
Ae Madine ke musafir dar pe le ke mera naam
Dasht-e-basta arz karna un se ro ro kar salam
Roke karna mere iman ki hifazat ki dua
De shahadat ka sharaf mujh ko Madine mein Khuda
Is ka hajj ya Rabb! Nabi ka wasta kar le qabool
Do-jahan mein is pe barsaya Khuda rehmat ke phool
Apne munh se khud ko haji tum kehna nahi
Be-zarurat apni neki ka bayan achha nahi
Har baras hajj ka sharaf pao Madine jao tum
Aur Baqi-e-Pak mein aakhir mein madfan pao tum
Karna tum Attar ke haq mein dua-e-maghfirat
Is jahan mein aafiyat ho us jahan mein aafiyat
Jhoot ki tareef
Khilaf-e-waqia baat karna jan boojh kar ho ya ghalti se.
(Fathul Bari j 1 s 182 tahtul hadith 107)