Kab gunahon se kinara main karoon ga ya Rab

Kab gunahon se kinara main karoon ga ya Rab! Nek kab mere Allah! banoon ga ya Rab! Kab gunahon ke marz se main shifa paoon ga Kab main bimar-e-Madine ka banoon ga ya Rab! Gar tere pyare ka jalwa na raha pesh-e-nazar Sakhtiyan naz'a ki kiyon kar main sahoon ga ya Rab! Naz'a ke waqt mujhe jalwa-e-mehboob dikha Tera kya jaye ga main shaad maroon ga ya Rab! Qabr mein gar na Muhammad ke nazare honge Hashr tak kaise main tanha rahoon ga ya Rab! Dank machchar ka saha jata nahin, kaise main phir Qabr mein bichhoo ke dank ah sahoon ga ya Rab! Ghap andhere ka bhi wehshat ka basera hoga Qabr mein kaise akela main rahoon ga ya Rab! Gar kafan phaad ke saanpon ne jamaya qabza Haye barbadi! kahan jake chhupoon ga ya Rab! Haye! mamooli si garmi bhi sahi jati nahin Garmi-e-hashr mein phir kaise sahoon ga ya Rab! Aaj banta hoon muazzaz jo khule hashr mein aib Aah! ruswai ki aafat mein phansoon ga ya Rab! Pul-e-sirat aah! hai talwar ki bhi dhaar se tez Kis tarah se main isay paar karoon ga ya Rab! Qabr mehboob ke jalwon se basa de Maalik Yeh karam kar de to main shaad rahoon ga ya Rab! Gar tu naraz hua meri halakat hogi Haye! main naar-e-jahannam mein jaloon ga ya Rab! Dard-e-sar ho ya bukhar aaye tarap jata hoon Main jahannam ki saza kaise sahoon ga ya Rab! Afu kar aur sada ke liye raazi ho ja Gar karam kar de to jannat mein rahoon ga ya Rab! Tu hai Mu'ti woh hain Qasim yeh karam hai tera Tere mehboob ke tukron pe paloon ga ya Rab!