Aik baar hum chand islami bhai Hazrat Sayyidi Waqar-ul-Millat Rahmatullah Ta'ala Alaih ke sath car mein ja rahay thay, silsila-e-guftagu jaari tha. Main ne arz ki: Huzoor! Aap ne kabhi khwab mein Sarkar-e-Namdar Sallallahu Ta'ala Alaih-e-wa-Aalihi-wa-Sallam ka deedar kiya ho to irshad farma kar hamari zauq afzai kijiye. Irshad farmaya: Aik baar main ne khwab mein apne aap ko Sarkar-e-Madina Sallallahu Ta'ala Alaih-e-wa-Aalihi-wa-Sallam ke rauza-e-pur-anwar par hazir paya, itnay mein qabr-e-anwar se pyaray pyaray Aqa bethay bethay Mustafa Sallallahu Ta'ala Alaih-e-wa-Aalihi-wa-Sallam bahar tashreef le aaye aur.... mujhe seenay se laga liya. Sag-e-Madina 'Ufi Anhu
Aakhri deedar ke waqt aankh meri ro padi
Dekh kar zer-e-kafan surat Waqar-ud-Din ki
Ya Ilahi! Wasta tujh ko Rasool-e-Pak ka
Noor se mamoor kar turbat Waqar-ud-Din ki
Wasta Ghous-o-Raza ka ae Khudaye Mustafa
Khwab mein mujh ko dikha surat Waqar-ud-Din ki
Un ke faiz-e-khas se Attar bhi hai faizyab
Is pe kuch zaid hi thi shafqat Waqar-ud-Din ki
Tu to hai Attar bad-atwar, woh aali waqar
Kya likhay ga manqabat Hazrat-e-Waqar-ud-Din ki
Alhamdulillah Azzawajal Waqar-ul-Millat Rahmatullah Ta'ala Alaih ne mujhe apni khilafat se nawaza, bator-e-tahdees-e-ni'mat mazkoora sher mein is taraf ishara kiya hai. Sag-e-Madina 'Ufi Anhu