Pesh-e-Haq muzda-e-shafaat ka sunaye jayenge
Aap rote jayenge hum ko hansate jayenge
Dil nikal jaane ki ja hai aah kin aankhon se woh
Hum se pyason ke liye dariya bahate jayenge
Kushtagan-e-garmi-e-mehshar ko woh jaan-e-maseeh
Aaj daaman ki hawa de kar jalate jayenge
Gul khile ga aaj yeh un ki naseem-e-faiz se
Khoon rote aayenge hum muskurate jayenge
Haan chalo hasrat-zadon sunte hain woh din aaj hai
Thee khabar jis ki ke woh jalwa dikhate jayenge
Aaj eid-e-ashiqaan hai agar khuda chahe ke woh
Abru-e-pewasta ka aalam dikhate jayenge
Kuch khabar bhi hai faqiro aaj woh din hai ke woh
Nemat-e-khuld apne sadqe mein lutate jayenge
Khak-e-uftad-o-bas un ke aane hi ki der hai
Khud woh gir kar sajda mein tum ko uthate jayenge
Wusatein di hain khuda ne daaman-e-mehboob ko
Jurm khulte jayenge aur woh chupate jayenge
Lo woh aaye muskurate hum aseeron ki taraf
Kharman-e-isyaan par ab bijli girate jayenge
Aankh kholo ghamzada dekho woh giryaan aaye hain
Lauh-e-dil se naqsh-e-gham ko ab mitate jayenge
Sokhta jaano pe woh pur josh-e-rehmat aaye hain
Aab-e-kausar se lagi dil ki bujhate jayenge
Aftab un ka hi chamkay ga jab auron kay charagh
Sarsar-e-josh-e-bala say jhilmilatay jayen gay
Paaye go ban pul say guzrayn gay teri aawaz par
Rabbi sallim ki sada par wajd laatay jayen gay
Sarwar-e-deen lijay apnay natawanon ki khabar
Nafs-o-shaitan sayyada kab tak dabaye jayen gay
Hashr tak dalain gay hum paidaish-e-maula ki dhoom
Masl-e-Faris Najd kay qilay giratay jayen gay
Khaak ho jayen adoo jal kar magar hum toh Raza
Dam mein jab tak dam hai zikr un ka sunatay jayen gay