Yaad mein jis ki nahin hosh-e-tan-o-jaan hum ko
Phir dikha de woh rukh-e-mehr-e-furozan hum ko
Der se aap mein aana nahin milta hai hamen
Kya hi khud rafta kya jalwa-e-janan hum ko
Jis tabassum ne gulistan pe girayi bijli
Phir dikha de woh ada-e-gul-e-khandan hum ko
Kaash aawiza-e-qandeel-e-madina ho woh dil
Jis ki sozish ne kiya rashk-e-chiraghan hum ko
Arsh jis khoobi-e-raftar ka paamal hua
Do qadam chal ke dikha sarv-e-kharaman hum ko
Shama-e-Taiba se main parwana rahoon kab tak door
Haan jala de sharar-e-aatish-e-pinhaan hum ko
Khauf hai sam-e-kharashi sag-e-Taiba ka
Warna kya yaad nahin nala-o-afghan hum ko
Khaak ho jayen dar-e-paak pe hasrat mit jaye
Ya Ilahi na phira be-sar-o-samaan hum ko
Khaar-e-sahra-e-Madina na nikal jaye kahin
Wehshat-e-dil na phira koh-o-bayaban hum ko
Tung aaye hain do aalam teri betabi se
Chain lene de tap-e-seena-e-sozan hum ko
Paon ghirbal huye raah-e-Madina na mili
e Junoon! ab to mile rukhsat-e-zindan hum ko
Mere har zakhm-e-jigar se yeh nikalti hai sada
e Maleeh-e-Arabi! kar de namakdan hum ko
Sair-e-gulshan se aseeran-e-qafas ko kya kaam
Na de takleef-e-chaman bulbul-e-bustan hum ko
Jab se aankhon mein samayi hai Madina ki bahaar
Nazar aate hain khazan deedah gulistan hum ko
Gar lab-e-paak se iqrar-e-shafa'at ho jaye
Yun na be-chain rakhe joshish-e-isyan hum ko
Naiyir-e-hashr ne ik aag laga rakhi hai
Tez hai dhoop mile saya-e-daman hum ko
Reham farmayiye ya Shah ke ab taab nahin
Ta-ba-ke khoon rulaye gham-e-hijran hum ko
Chaak daman mein na thak jayiye e dast-e-junoon
Purze karna hai abhi jaib-o-gareban hum ko
Parda us chehra-e-anwar se utha kar ik baar
Apna aaina bana e mah-e-taban hum ko
e Raza wasf-e-rukh-e-paak sunane ke liye
Nazr dete hain chaman, murgh-e-ghazal khwan hum ko