Aao mehfil mein ghulaman-e-Rasool-e-Arabi
Aaj hai josh pe faizan-e-Rasool-e-Arabi
Jhoomte phirte hain mastan-e-Rasool-e-Arabi
Hai mehak par chamanistan-e-Rasool-e-Arabi
Kaise ushaq thay yaran-e-Rasool-e-Arabi
Apne sar kar diye qurban-e-Rasool-e-Arabi
Aisi wusat se bichha khwan-e-Rasool-e-Arabi
Sara alam hua mehman-e-Rasool-e-Arabi
Kaaba-o-arz-o-sama shams-o-qamar hoor-o-malak
Hain sabhi tabay-e-farman-e-Rasool-e-Arabi
Hoor-o-ghilman ki tamanna ho na shauq-e-jannat
Jis ne dekha hai bayaban-e-Rasool-e-Arabi
Apni qismat pe na kyun fakhr karoon lakhon baar
Dekhoon jab gumbad-e-aiwan-e-Rasool-e-Arabi
Us ne Allah ke jalwon ka kiya nazara
Jis ne dekha rukh-e-taban-e-Rasool-e-Arabi
Un ki midhat nahi kuch ins-o-malak par mauqoof
Zarra zarra hai sana khwan-e-Rasool-e-Arabi
Kis ko sarkar se nemat na mili kaun hai woh
Jo nahi banda-e-ehsan-e-Rasool-e-Arabi
Ramz-e-mehboob-o-mohabbat kaun samajh sakta hai
Hukm-e-Rahman hai farman-e-Rasool-e-Arabi
Qabr-o-mehshar ka unhein gham hi nahi kuch aslan
Jin ke hathon mein hai daman-e-Rasool-e-Arabi
Un ka banda hua Allah ka mehboob bana
Saaf farmata hai Quran-e-Rasool-e-Arabi
Teera bakhton ke muqaddar ko zara chamka de
Ae ziya-e-dur-e-dandan-e-Rasool-e-Arabi
Deen-o-dunya ki mayassar hui un ko shahi
Jo huay dil se gadayan-e-Rasool-e-Arabi
Chhor kar saltanatein un ke bane khak nasheen
Afreen baad faqiran-e-Rasool-e-Arabi
Ro-ba-ro misl-e-kaf-e-dast hain dono aalam
Kaisi pur-noor hain chashman-e-Rasool-e-Arabi
Baad-e-hub-e-Nabi khoob jamayi rangat
Huay mast ghulaman-e-Rasool-e-Arabi
Chashm-e-dil gor-e-ghareeban ko munawwar kar de
Main fida shama-e-shabistan-e-Rasool-e-Arabi
Qabr mein jab ke Nakirein karein mujh se sawal
Main kahoon banda-e-darban-e-Rasool-e-Arabi
Dakhil-e-khuld kiye jayenge ahl-e-isyan
Josh par aayegi jab shan-e-Rasool-e-Arabi
Fateh-e-bab-e-shafa'at ke sabab hukm-e-mila
Jayen jannat mein gadayan-e-Rasool-e-Arabi
Ya Ilahi yeh dua hai ke baroz-e-mehshar
Sar pe ho saya-e-daman-e-Rasool-e-Arabi
Ae Jamil-e-Razvi teri haqeeqat kya hai
Jab Khuda khud hai sana khwan-e-Rasool-e-Arabi
Yeh Raza ka hai tasadduq ke Jamil-e-Razvi
Hua mashhoor sana khwan-e-Rasool-e-Arabi
Han suna koi ghazal aur Jamil-e-Razvi
Ke hain mushtaq muhibban-e-Rasool-e-Arabi