Ajab karam Shah-e-Wala karte hain
Ke na-umeedon ko umeedwar karte hain
Jama ke dil mein safein hasrat-o-tamanna ki
Nigah-e-lutf ka hum intezar karte hain
Mujhe fasurdagi-e-bakht ka alam kya ho
Woh ek dam mein khizaan ko bahar karte hain
Khuda sagan-e-Nabi se yeh mujh ko sunwa de
Hum apne kutton mein tujh ko shumaar karte hain
Malaika ko bhi hain kuch fazilein hum par
Ke paas rehte hain tawaf-e-mazar karte hain
Jo khush naseeb yahan khaak-e-dar pe baithte hain
Juloos-e-masnad-e-shahi se aar karte hain
Hamare dil ki lagi bhi wahi bujha denge
Jo dam mein aag ko bagh-o-bahar karte hain
Ishara kar do to baad-e-khilaf ke jhonke
Abhi hamare safine ko paar karte hain
Tumhare dar ke gadaon ki shaan aali hai
Woh jis ko chahte hain tajdar karte hain
Gada gada hai gada to kya hi chahiye adab
Bare bare tere dar ka waqar karte hain
Tamam khalq ko manzoor hai Raza jin ki
Raza Huzoor ki woh ikhtiyar karte hain
Suna ke wasf-e-rukh-e-Paak andaleeb ko hum
Raheen-e-aamad-e-fasl-e-bahar karte hain
Hawa khilaf ho chakraye nao kya gham hai
Woh ek aan mein bere ko paar karte hain
Aana liha hai woh bazaar-e-kushpursan mein
Tasalli-e-dil-e-be-ikhtiyar karte hain
Banayi pusht na Kaaba ki un ke ghar ki taraf
Jinhein khabar hai woh aisa waqar karte hain
Kabhi woh tajwaran-e-zamana kar na sakein
Jo kaam aap ke khidmat-guzar karte hain
Hawa-e-daman-e-jaanan ke jhonke
Khizaan-raseedon ko bagh-o-bahar karte hain
Sagan-e-koo-e-Nabi ke naseeb par qurbaan
Pare hue sar-e-reh iftikhar karte hain
Koi yeh puche mere dil se meri hasrat se
Ke toote haal mein kya gham-gusar karte hain
Woh un ke dar ke faqiron se kyon nahi kehte
Jo shikwa-e-sitam-e-rozgar karte hain
Tumhare hijr ke sadmon ki taab kis ko hai
Yeh chob-e-khushk ko bhi be-qarar karte hain
Kisi bala se unhein pohanche kis tarah aaseeb
Jo tere naam se apna hisaar karte hain
Suna na marte hue aaj tak kisi ne unhein
Jo apne jaan o dil un par nisar karte hain
Unhein ka jalwa sar-e-bazm dekhte hain patang
Unhein ki yaad chaman mein hazar karte hain
Mere kareem na aahu ko qaid dekh sake
Abas aseer-e-alam intishar karte hain
Jo zarre aate hain paaye huzoor ke neeche
Chamak ke mehr ko woh sharmsar karte hain
Jo mooye paak ko rakhte hain apni topi mein
Shuja'atein woh dam-e-karzar karte hain
Jidhar woh aate hain ab us mein dil hon ya raahein
Mehak se gesuon ki mushk-bar karte hain
Hassan ki jaan ho us wus'at-e-karam pe nisar
Ke ik jahan ko umeed-war karte hain