Aye saba tera guzar ho jo Madina mein kabhi
Jana us gumbad-e-khizra mein ke hain jis mein Nabi
Hath se apnay pakar kar woh sunheri jaali
Arz karna meri janib se ba-sad shauq-e-dili
Hai tamanna yeh Khuda se ke Rasool-e-Arabi
Apni aankhon ko maloon aap ki chaukhat se Nabi
Umr saari to kati lahw-o-la'b mein Aqa
Zindagi ka koi lamha nahin achha guzra
Saaray a'maal-e-sayah jurm se daftar hai bhara
Arzoo hai ke gunahon ka ho yun kaffara
Hai tamanna yeh Khuda se ke Rasool-e-Arabi
Apni aankhon ko maloon aap ki chaukhat se Nabi
Arz karna ke kahan mujh sa kameena ganda
Aur woh shehr kahan jis mein hon Mehboob-e-Khuda
Han suna hai ke nibhate hain buron ko Maula
Is liye Aap ke darwazay pe deta hai sada
Hai tamanna yeh Khuda se ke Rasool-e-Arabi
Apni aankhon ko miloon Aap ki chaukhat se Nabi
Arzoo dil ki hai jab band ho harkat-e-dil ki
Aankh pathraye mujhe aaye akhiri hichki
Rooh jaane lage jab chhod ke jism-e-khaki
Jism Taiba mein ho aur jaan chale su-e-Nabi
Hai tamanna yeh Khuda se ke Rasool-e-Arabi
Apni aankhon ko miloon Aap ki chaukhat se Nabi
Ya Nabi is ke siwa main kya arz karoon
Aap ka hoon ke jiyoon Aap ka ho ke hi maroon
Aap ke dar se pala Aap ke dar par hi mitoon
Jaan tum se mili tum par hi nichawar kar doon
Hai tamanna yeh Khuda se ke Rasool-e-Arabi
Apni aankhon ko miloon Aap ki chaukhat se Nabi
Gar muyassar nahin Saalik ko huzoor-e-badani
Rooh hazir hai magar misl-e-Owais-e-Qarni
Jism-e-Hindi hai mera jaan hai meri Madani
Ya Khuda door kisi tarah ho bu'd-e-badani
Hai tamanna yeh Khuda se ke Rasool-e-Arabi
Apni aankhon ko miloon Aap ki chaukhat se Nabi