Bartar qiyas se hai maqam-e-Abul Hussain
Sidra se poocho rif'at-e-baam-e-Abul Hussain
Warasta paye basta daam-e-Abul Hussain
Azad-e-naar se hai ghulam-e-Abul Hussain
Khat-e-siyah mein noor-e-ilahi ki tabishein
Kya subh-e-noor baar hai shaam-e-Abul Hussain
Saqi suna de sheesha Baghdad ki tapak
Mehkai hai bu-e-gul se mudaam-e-Abul Hussain
Bu-e-kabab-e-sookhta aati hai may-kasho
Chhalka sharab-e-Chisht se jaam-e-Abul Hussain
Gulgoon sahar ko hai sahar soz-e-dil se aankh
Sultan-e-Suharward hai naam-e-Abul Hussain
Kursi nasheen hai naqsh-e-murad un ke faiz se
Moula-e-naqsh-e-band hai naam-e-Abul Hussain
Jis nakhl-e-paak mein hain chhalis daliyan
Ek shakh un mein se hai ba-naam-e-Abul Hussain
Maston ko ae kareem bachaye khumar se
Ta daur-e-hashr daura-e-jaam-e-Abul Hussain
Un ke bhale se lakhon gareebon ka hai bhala
Ya Rab zamana baad ba-kaam-e-Abul Hussain
Mela laga hai shaan-e-Masiha ki deed hai
Murday jala raha hai kharam-e-Abul Hussain
Sargashta-e-mehr-o-meh hain par ab tak khula nahin
Kis charkh par hai mah-e-tamam-e-Abul Hussain
Itna pata mila hai ke yeh charkh-e-chanbari
Hai haft paya zeena-e-baam-e-Abul Hussain
Zarra ko mehr, qatra ko dariya kare abhi
Gar josh zan ho bakhshish-e-aam-e-Abul Hussain
Yahya ka sadqa waris-e-iqbal mand paye
Sajjada-e-shuyukh-e-kiram-e-Abul Hussain
Inam lein bahar-e-jinan tahniyat likhein
Phoole phale to nakhl-e-maram-e-Abul Hussain
Allah hum bhi dekh lein shahzada ki bahar
Soonghay gul-e-murad masham-e-Abul Hussain
Aqa se mere suthray miyan ka hua hai naam
Is achay suthray se rahe naam-e-Abul Hussain
Ya Rab woh chand jo falak-e-izz-o-jah par
Har sair mein ho gaam ba-gaam-e-Abul Hussain
Aao tumhein hilal-e-sipihr-e-sharaf dikhayen
Gardan jhukayen bahr-e-salam-e-Abul Hussain
Qudrat-e-Khuda ki hai ke taltam kunan uthi
Bahr-e-fana se mauj-e-dawam-e-Abul Hussain
Ya Rab hamein bhi chashni is apni yaad ki
Jis se hai shakkarin lab-o-kaam-e-Abul Hussain
Han tali-e-Raza teri Allah re yawari
Ae banda-e-jadood-e-kiram-e-Abul Hussain