Dil haye gunahon se bezaar nahin hota
Maghloob shaha! nafs-e-badkar nahin hota
Shaitan musallat hai afsos! kisi surat
Ab sabr-e-gunahon par sarkar nahin hota
Ae rab ke habeeb aao! ae mere tabeeb aao
Achha yeh gunahon ka beemar nahin hota
Go lakh karoon koshish islah nahin hoti
Pakiza gunahon se kirdar nahin hota
Yeh saans ki mala ab bas tootne wali hai
Dil aah! magar ab bhi bedaar nahin hota
Sunnat ki taraf logo! tum kyon nahin aajate
Kyon sard gunahon ka bazaar nahin hota
Sarkar ka aashiq bhi kya darhi mundata hai!
Kyon ishq ka chehre se izhaar nahin hota
Aqa ki itaat se ji apna churate hain
Jo, aison se khush rab-e-ghaffar nahin hota
Jeene ka maza us ko milta hi nahin jis ka
Dil ishq-e-muhammad se sarshar nahin hota
Jo yaad-e-madina mein din raat tarapte hain
Door un se madine ka darbar nahin hota
Maghmoom hai gham jis ko aqa ka nahin milta
Beemar hai jo un ka beemar nahin hota
Khushiyon mein masarrat mein aasaish o rahat mein
Asrar-e-mohabbat ka izhaar nahin hota
Woh ishq-e-haqiqi ki lazzat nahin pa sakta
Jo ranj o museebat se do char nahin hota
Ae zair-e-taiba! tu dam tor de chaukhat par
Deedar-e-madine ka har baar nahin hota
Kaun aisi kare jurat keh sakta nahin aaqil
Sarkar ka deewana hoshiyar nahin hota
Aajaye madine mein le jaye zara si khaak
Jo theek kisi surat beemar nahin hota
Ae sail-o! aao aur jholiyan phailao
Darbar-e-risalat se inkar nahin hota
Woh bahr-e-sakhawat hain woh qasim-e-ni'mat hain
Taiba ka gada hargiz nadar nahin hota
Duniya mein bhi thanda hai uqba mein bhi thanda hai
Jo un ka hai deewana woh khwar nahin hota
Duniya mein bhi jalta hai uqba mein bhi jalta hai
Main kaise kahoon munkir fi-annar nahin hota
Choro ae farishto woh, aate hain shafa'at ko
Woh jis ke bhi haami hain fi-annar nahin hota
Afsos nadamat bhi isyan pe nahin hoti
Neki ki taraf mail-e-attar nahin hota
Aqa ka gada ho kar attar tu ghabraye
Ghaboraye duhi jis ka ghamkhwar nahin hota