Dil se mere duniya ki mohabbat nahi jaati
Sarkar! gunahon ki bhi aadat nahi jaati
Din raat musalsal hai gunahon ka tasalsul
Kuch tum hi karo na ye nahoosat nahi jaati
Khane ki ziyadat hai to sone ki bhi kasrat
Aur khanda-e-be-ja ki bhi khaslat nahi jaati
Go pesh-e-nazar qabr ka phool gadha hai
Afsos! magar phir bhi ye ghaflat nahi jaati
Aye Rahmat-e-Konain! kamine pe karam ho
Haaye! nahi jaati buri khaslat nahi jaati
Jee chahta hai phoot ke rou'n tere gham mein
Sarkar! magar dil ki qasawat nahi jaati
Kya ho gaya Sarkar! khayalon ko hamare
Aghyar ke fashion ki nuhusat nahi jati
Go lakh bura hi sahi mayus nahi hoon
Sad shukr ke umeed-e-shafa'at nahi jati
Aadat mujhe maloom hai Aqa ki kisi ka
Dil tod ke jati nahi rehmat nahi jati
"Apno" ko to Sarkar! tabahi se bacha lo
Be-charon ke seenon se adawat nahi jati
Allah ghani! shan-e-wali! raaj dilon par
Duniya se chale jayen hukumat nahi jati
Kuch aisi kashish tujh mein hai aye shehar-e-Madina!
Go hazri sau baar ho hasrat nahi jati
Nairangi-e-duniya ke tamashon ki khabar hai
Attar to kyon dil se yeh ulfat nahi jati