Hajiyo! Aao Shehanshah Ka Roza Dekho
Ka'ba To Dekh Chuke Ka'ba Ka Ka'ba Dekho
Rukn-e-Shami Se Miti Wehshat-e-Shaam-e-Gurbat
Ab Madina Ko Chalo Subh-e-Dil Aara Dekho
Aab-e-Zamzam To Piya Khoob Bujhaein Piyasien
Aao Jood-e-Shah-e-Kauthar Ka Bhi Darya Dekho
Zer-e-Meezab Mile Khoob Karam Ke Chheente
Abr-e-Rehmat Ka Yahan Zor Barasna Dekho
Dhoom Dekhi Hai Dar-e-Ka'ba Pe Betabon Ki
Un Ke Mushtaqon Mein Hasrat Ka Tadapna Dekho
Misl-e-Parwana Phira Karte The Jis Shama Ke Gird
Apni Us Shama Ko Parwana Yahan Ka Dekho
Khoob Aankhon Se Lagaya Hai Ghilaf-e-Ka'ba
Qasr-e-Mehboob Ke Parde Ka Bhi Jalwa Dekho
Wan Muti'on Ka Jigar Khauf Se Pani Paya
Yan Siyah Karon Ka Daman Pe Machalna Dekho
Awwaleen Khana-e-Haq Ki To Ziyaein Dekhein
Aakhireen Bait-e-Nabi Ka Bhi Tajalla Dekho
Zeinat-e-Ka'ba Mein Tha Lakh Arooson Ka Banao
Jalwa Farma Yahan Konain Ka Dulha Dekho
Aiman-e-Toor Ka Tha Rukn-e-Yamani Mein Farogh
Shola-e-Toor Yahan Anjuman Aara Dekho
Mehar-e-Madar Ka Maza Deti Hai Aagosh-e-Hateem
Jin Pe Maa Baap Fida Yan Karam Un Ka Dekho
Arz-e-Hajat Mein Raha Ka'ba Kafeel-e-Injah
Aao Ab Royiye Shah-e-Taiba Ka Dekho
Dho Chuka Zulmat-e-Dil Bosa-e-Sang-e-Aswad
Khak-e-Bosi-e-Madina Ka Bhi Rutba Dekho
Kar Chuki Riffat-e-Ka'ba Pe Nazar Parwazein
Topi Ab Thaam Ke Khak-e-Dar-e-Wala Dekho
Be-Niyazi Se Wahan Kanpti Payi Ta'at
Josh-e-Rehmat Pe Yahan Naaz-e-Gunah Ka Dekho
Juma-e-Makka Tha Eid-e-Ahl-e-Ibadat Ke Liye
Mujrimo! Aao Yahan Eid-e-Doshanba Dekho
Multazam Se To Gale Lag Ke Nikale Arman
Adab-o-Shauq Ka Yahan Baham Uljhna Dekho
Khoob Mas'a Mein Ba-Umeed-e-Safa Daur Liye
Reh-e-Janan Ki Safa Ka Bhi Tamasha Dekho
Raqs-e-Bismil Ki Baharein To Mina Mein Dekhein
Dil-e-Khoonaba Fishan Ka Bhi Tadapna Dekho
Ghaur Se Sun To Raza Ka'ba Se Aati Hai Sada
Meri Aankhon Se Mere Pyare Ka Roza Dekho