Hirz-e-jaan zikr-e-shafaat kijiye
Naar se bachne ki surat kijiye
Un ke naqsh-e-pa pe ghairat kijiye
Aankh se chhip kar ziarat kijiye
Un ke husn-e-ba malahat par nisar
Shira-e-jaan ki halawat kijiye
Un ke dar par jaise ho mit jaiye
Natwano! kuch to himmat kijiye
Phir dabiye panja-e-dev-e-la'in
Mustafa ke bal pe taqat kijiye
Doob kar yaad-e-lab-e-shadab mein
Aab-e-kausar ki sabahat kijiye
Yad-e-qamat karte uthiye qabr se
Jan-e-mahshar par qayamat kijiye
Un ke dar par baithiye ban kar faqir
Be-nawao fikr-e-sarwat kijiye
Jis ka husn-e-Allah ko bhi bha gaya
Aise pyare se mohabbat kijiye
Hay-e-baqi jis ki karta hai sana
Marte dam tak us ki midhat kijiye
Arsh par jis ki kamanen chadh gayin
Sadqe us bazu pe quwwat kijiye
Neem-wa Taiba ke phoolon par ho aankh
Bulbulo! paas-e-nazakat kijiye
Sar se girta hai abhi baar-e-gunah
Kham zara farq-e-iradat kijiye
Aankh to uthti nahi kya dein jawab
Hum pe be-pursish hi rehmat kijiye
Uzr-e-badtar az gunah ka zikr kya
Be-sabab hum par inayat kijiye
Na'ra kijiye Ya Rasool Allah ka
Mufliso! Saman-e-daulat kijiye
Hum tumhare ho ke kis ke paas jayen
Sadqa shehzadon ka rehmat kijiye
Man raani qad ra'al haq jo kahe
Kya bayan us ki haqiqat kijiye
Alam-e-ilm-e-do alam hain huzoor
Aap se kya arz-e-hajat kijiye
Aap Sultan-e-Jahan hum be-nawa
Yad hum ko waqt-e-nemat kijiye
Tujh se kya kya aye mere Taiba ke chand
Zulmat-e-gham ki shikayat kijiye
Dar-ba-dar kab tak phiren khasta kharab
Taiba mein madfan inayat kijiye
Har baras woh qafilon ki dhoom dhaam
Aah seenay aur ghaflat kijiye
Phir palat kar munh na us janib kiya
Sach hai aur dawa-e-ulfat kijiye
Aqriba hub-e-watan be-himati
Aah kis kis ki shikayat kijiye
Ab to Aqa munh dikhane ka nahi
Kis tarah raf-e-nadamat kijiye
Apne hathon khud luta baithe hain ghar
Kis pe dawa-e-baza'at kijiye
Kis se kahiye kya kya kya ho gaya
Khud hi apne par malamat kijiye
Arz ka bhi ab to munh parta nahi
Kya ilaj-e-dard-e-furqat kijiye
Apni ek meethi nazar ke shehd se
Charah-e-zehr-e-museebat kijiye
De Khuda himmat ke yeh jaan-e-hazein
Aap par warein woh surat kijiye
Aap hum se barh ke hum par meherban
Hum karein jurm aap rehmat kijiye
Jo na bhoola hum gharibon ko Raza
Yad us ki apni aadat kijiye