Jaan se tang hain qaidi gham-e-tanhai ke
Sadqe jaaun mein teri anjuman aarai ke
Bazm ara hon ujale teri zebai ke
Kab se mushtaq hain aaine khud aarai ke
Ho ghubar-e-dar-e-mehboob ke gard-e-rah-e-dost
Juz-e-aazam hain yahi surma-e-binaai ke
Khaak ho jaye agar teri tamannao mein
Kyun milein khaak mein armaan-e-tamannai ke
Wa raf'ana laka zikrak ke chamakte khursheed
La-makan tak hain ujale teri zebai ke
Dil-e-mushtaq mein armaan-e-liqa aankhein band
Qabil-e-deed hain andaaz-e-tamannai ke
Lab-e-jaan-bakhsh ki kya baat hai SubhanAllah
Tum ne zinda kiye aijaz-e-maseehai ke
Apne daman mein chupayein woh mere aibon ko
Ae zahe bakht meri zillat-o-ruswai ke
Dekhne wale khuda ke hain khuda shahid hai
Dekhne wale tere jalwa-e-zebai ke
Jab ghubar-e-rah-e-mehboob ne izzat bakhshi
Aaine saaf huye ainak-e-binaai ke
Baar-e-sar par hai naqahat se gira jata hoon
Sadqe jaaun tere bazu ki tawanai ke
Alim-ul-ghaib ne har ghaib se aagah kiya
Sadqe us shaan ki binaai-o-danaai ke
Dekhne wale ho tum raat ki tareeki mein
Kaan mein sam'a ke aur aankh mein binaai ke
Ghaibi nutfe hain woh be-ilm-e-jaham ke andhe
Jin ko inkaar hain is ilm-o-shanasai ke
Ae Hasan Kaaba hi afzal sahi us dar se magar
Ham to khugar hain yahan nasiya-farsai ke