Madine ki taraf phir kab rawana qafila ho ga
Mujhe izn-e-Madina kab mere Aaqa ata ho ga
Yaqeenan roz-e-Mehshar sirf usi se khush Khuda ho ga
Yahan dunya mein jis ne Mustafa ko khush kiya ho ga
Wohi sar bar sar-e-Mehshar bulandi paye ga jo sar
Yahan dunya mein un ke aastanay par jhuka ho ga
Koi hafta na koi din koi ghanta to kya afsos
Koi lamha bhi isyaan se nahin khaali gaya ho ga
Nahin jaati gunahon ki shaha! aadat nahin jaati
Karam Maula pas-e-murdan na janay mera kya ho ga
Faqat nekon pe ho ga gar karam aye Sarwar-e-Aalam!
Kahan jaye ga woh banda jo bad ho ga bura ho ga
Tere rahm-o-karam par aas main ne baandh rakhi hai
Badi umeed hai Aaqa! Karam roz-e-jaza hoga
Nabi ke aashiqon ko maut to anmol tohfa hai
Ke un ko qabr mein deedar-e-shah-e-anbiya hoga
Andheri gor hai tanha hoon mujh par khauf taari hai
Tum aaoge to Aaqa door andhera qabr ka hoga
Farishte qabr mein poochenge jab mujh se suwal aakar
Mere lab par tarana in sha Allah naat ka hoga
Nabi ke aashiqon ki eid hogi eid-e-mahshar mein
Koi qadmon mein hoga koi seene se laga hoga
Tere daaman-e-rahmat ki khule gi hashr mein wus'at
Woh aa aakar chhupe ga jo gunahgar aur bura hoga
Tasalli rakh tasalli rakh na ghabra hashr se Attar
Tera haami wahan par Aamina ka laadla hoga
Na ghabra maut se Attar barzakh mein tu mil lena
Wahan Ghous-ul-Wara hoga wahan Ahmad Raza hoga