Main jo yun Madine jata to kuch aur baat hoti
Kabhi laut kar na aata to kuch aur baat hoti
Main Madine to gaya tha yeh bada sharaf tha lekin
Wahien dam jo toot jata to kuch aur baat hoti
Gam-e-rozgar mein to mare ashk beh rahe hain
Tera gam agar rulata to kuch aur baat hoti
Na fuzool kaash! hansta teri yaad mein tadapta
Mujhe chain hi na aata to kuch aur baat hoti
Yahi aah! fikr-e-duniya mera dil jala rahi hai
Gam-e-hijr gar satata to kuch aur baat hoti
Yahan qabr mein karam se teri deed mujh ko hogi
Jo Baqi-e-Pak pata to kuch aur baat hoti
Bazaban-e-zaireen to main salam bhejta hoon
Kabhi khud salam lata to kuch aur baat hoti
Are zair-e-Madina! tu khushi se hans raha hai
Dil-e-gamzada jo lata to kuch aur baat hoti
Mari aankh jab bhi khulti teri rehmaton se Aqa
Tujhe samne hi pata to kuch aur baat hoti
Tu Madina chhod aaya tujhe kya hua tha Attar
Wahien ghar agar basata to kuch aur baat hoti