Mera dil pak ho Sarkar ki mohabbat se
Mujhe ho jaye nafrat kash! Aaqa maal-o-daulat se
Madine se agarche door hoon teri mashiyat se
Tadapne ki sa'adat de Ilahi hijr-o-furqat se
Na London ki na America na Paris ki sayahat se
Sukoon-e-qalb milta hai Madine ki ziyarat se
Khuda hafiz Madine ke musafir ja Khuda hafiz
Chalein ge shoo-e-Taiba hum bhi ek din un ki rehmat se
Khuda ki tujh pe lakhon rahmatain hon zair-e-Taiba!
Salam-e-shauq keh dena mera Mah-e-Risalat se
Muhammad Mustafa is ko bhi seene se lagate hain
Jisay sab log thukrate hain nafrat se haqarat se
Tumhara Na'al-e-Aqdas hi hamara taj-e-izzat hai
Hamara wasta kya taj-e-shahi se hukumat se
Jigar pyasa zaban sookhi khazan chhayi bahar aaye
Dil-e-pur-murda khul uthay tere jalwon ki nazhat se
Gunahon ki main chadar taan kar din raat sota hoon
Jaga do Ya Rasul Allah! Mujhe ab khwab-e-ghafilat se
Gunahon se mera sara wujood afsos hai lathra
Mujhe ab pak kar deeje gunahon ki nahoosat se
Nidamat se gunahon ka izala kuch to ho jata
Mujhe rona bhi aata nahin haye nidamat se
Karam aye Shafe-e-Mahshar! Khulay aamal ke daftar
Go badkar-o-kameena hoon magar hoon teri ummat se
Na naame mein ibaadat hai na palle kuch riyaazat hai
Ilahi! maghfirat farma hamari apni rehmat se
Ilahi! waasta deta hoon main meethe madeene ka
Bacha duniya ki aafat se bacha uqba ki aafat se
Musalman Eid-e-Milad-un-Nabi par shaad hota hai
Faqat Iblees ka chela chadhe jashn-e-wilaadat se
Badhe gi rehmaton ki jis ghadi khairaat-e-mahshar mein
Shahan! mehroom mat karna mujhe apni shafa'at se
Tumhein maloom kya bhai! Khuda ka kaun hai maqbool
Kisi momin ko mat dekho kabhi tum haqarat se
Ujala hi ujala hoga uski qabr ke andar
Ho jis ka dil munawwar ulfat-e-mehr-e-risalat se
Karam se Attar jis dam ja raha hoga
Shayateen dekhte honge sabhi mur mur ke hasrat se