Mera ghar ghairat-e-khursheed-e-darakhshan hoga
Khair se jaan-e-qamar jab kabhi mehmaan hoga
Jo tabassum se ayan ek dur-e-dandan hoga
Zarra zarra meray ghar ka mah-e-taban hoga
Kyun mujhay khauf ho mahshar ka ke hathon mein meray
Daman-e-hami-e-khud mahi-e-isyan hoga
Palla-e-isyan ka garan bhi ho toh kya khauf mujhay
Meray pallay pe toh woh rehmat-e-rehman hoga
Mujh se aasi ko jo be-daagh chura layain ge
Ahl-e-mahshar mein jo dekhay ga woh hairan hoga
Koi munh mera takay ga ke yeh aasi hai
Jis ko hum jantay thay dakhil-e-mizan hoga
Koi us rehmat-e-alam pe tasadduq hoga
Koi yeh shaan-e-karam dekh ke qurban hoga
Majra dekh ke hoga yeh kisi ko sakta
Ek ta'ajjub se woh angusht-e-ba-dandan hoga
Un ki hairat pe kahoon ga ke ta'ajjub kya hai
Khud khuda hoga jidhar Sarwar-e-Zeeshan hoga
Dam nikal jaye tumhein dekh ke aasani se
Kuch bhi dushwar na hoga jo yeh aasaan hoga
Zakhm par zakhm yahi khaye yahi qatl bhi ho
Khoon-e-muslim abhi kya is se bhi arzaan hoga
Bheriyon ka hai yeh jungle nahi koi ra'i
Bholi bheron ka shaha kaun nigehban hoga
Zulm par zulm sahay aur sazain bhugtay
Aur uff ki na khanjar-e-burran hoga
Yahi andher agar aur bhi kuch roz raha
Toh Musalman ka nishan bhi na numayan hoga
Subh-e-roshan ki seyah bakhti se ab shaam hui
Kab qamar noor-e-deh-e-shaam-e-ghariban hoga
Tu agar chahay milay khaak mein Sultan-e-Zaman
Tera banda koi toh chahay toh Sultan hoga
Zulmat-e-qabr ka kya khauf mujhay ay Noori
Jab meray qalb mein imaan ka luma'an hoga