Musarrat se seena madina bana tha
Maza khoob Ramzan mein aa raha tha
Paray ranj o gham ka andhera hua tha
Maza khoob Ramzan mein aa raha tha
Khabar jab ke Ramzan ki aamad ki aayi
To murjhaye dil ki kali muskurayi
Aur abr-e-karam noor barsa raha tha
Maza khoob Ramzan mein aa raha tha
Nazar chand Ramzan ka jis waqt aaya
Hua rehmaton ka zamane pe saya
Ufaq par bhi abr-e-karam chha gaya tha
Maza khoob Ramzan mein aa raha tha
Khule baab-e-jannat, Jahannam ko taale
Paray, har taraf thay ujale ujale
Woh mardood shaitan qaidy bana tha
Maza khoob Ramzan mein aa raha tha
Tarane khushi ke fiza gungunati
Hua bhi musarrat ke naghme sunati
Jidhar dekhiye Marhaba Marhaba tha
Maza khoob Ramzan mein aa raha tha
Fazaen bhi kya noor barsa rahi thin
Hawaen musarrat se ithla rahi thin
Samaan har taraf kaif o masti bhara tha
Maza khoob Ramzan mein aa raha tha
Shab o roz rehmat ki barsat hoti
Ataon ki jholi mein khairaat hoti
Musalman ka daaman karam se bhara tha
Maza khoob Ramzan mein aa raha tha
Jo ulfat ke pemane taqseem hote
To bakhshish ke parwane tarqeem hote
Khusha! bahr-e-rehmat ko josh aa gaya tha
Maza khoob Ramzan mein aa raha tha
Masajid mein har su bahar aa gayi thi
Khuda ke karam ki ghata chha gayi thi
Jise dekho sajde mein aa kar gira tha
Maza khoob Ramzan mein aa raha tha
Fazaen munawwar hawaen muattar
Khuda ki qasam tha samaan kaif aawar
Dilon par bhi ik wajd sa chha gaya tha
Maza khoob Ramzan mein aa raha tha
Kaleje mein thandak thi, chehre pe paani
Dilon mein bhi thi kis qadar shadmani
Sukoon maah-e-Ramzan mein kaisa mila tha
Maza khoob Ramzan mein aa raha tha
Musalman thay khush rukh pe rounaq bari thi
Khuda ke karam ki barasti jhari thi
Ibadat mein dil kis qadar lag gaya tha
Maza khoob Ramzan mein aa raha tha
Sar-e-shaam-e-iftaar ki raunaqein thin
Ba-waqt-e-sahar kis qadar barkatein thin
Suroor aa raha tha maza aa raha tha
Maza khoob Ramzan mein aa raha tha
Muqaddar ne ki yaawari saath jin ke
Masajid mein woh mu'takif ho gaye thay
Ibadat ka kya khoob jazba mila tha
Maza khoob Ramzan mein aa raha tha
Ibadat mein ushshaq lazzat thay paate
Adab se talawat mein sar ko jhukaate
Namazon ka rozon ka bhi ek maza tha
Maza khoob Ramzan mein aa raha tha
Munajat-e-iftaar mein riqqatein thin
Duaon mein bhi kis qadar lazzatein thin
Jise dekho woh mehv-e-yaad-e-Khuda tha
Maza khoob Ramzan mein aa raha tha
Sana khwaan jis waqt naatein sunate
To Aaqa ke ushshaq aansu bahate
Nasha khoob ishq-e-Nabi ka chadha tha
Maza khoob Ramzan mein aa raha tha
Muballigh azabon se jis dam darata
Koi kapkapata koi thartharata
Koi gidgidata koi cheekhta tha
Maza khoob Ramzan mein aa raha tha
Ghari jabke Ramzan ki rukhsat ki aayi
Tadapte thay sadme se Islami bhai
Balkata tha koi, koi ghamzada tha
Maza khoob Ramzan mein aa raha tha
Dam-e-rukhsat-e-maah-e-Ramzan Musalman
The ghamgeen-o-hairaan, pareshan pareshan
Shab-e-Eid dekho jise ro raha tha
Maza khoob Ramzan mein aa raha tha
Mujhe maah-e-Ramzan ka gham de Ilahi
Mita hub-e-duniya ki dil se siyahi
Maza faani sunsaar mein kya rakha tha
Maza khoob Ramzan mein aa raha tha
Jo thay mu'takif 'Madani Markaz' ke andar
Bechare thay Attar maghmoom-o-muztar
Dam-e-alvida unka dil jal raha tha
Maza khoob Ramzan mein aa raha tha