Nigah-e-mehar jo us mehar ki idhar ho jaye
Gunah ke daagh mitein dil mera qamar ho jaye
Jo qalb-e-teera pe teri kabhi nazar ho jaye
To ek noor ka buq'a woh sar basar ho jaye
Hamari kisht-e-amal mein kabhi to phal aaye
Kabhi to shajara-e-umeed baar war ho jaye
Kabhi to aisa ho ya Rab woh dar ho aur ye sar
Kabhi to un ki gali mein mera guzar ho jaye
Hamara sar ho Khudaya Habib ka dar ho
Hamari umr Ilahi yunhi basar ho jaye
Jo sache dil se kahe koi Ya Rasool Allah
Musibatein bhi talein har meham bhi sar ho jaye
Meri musibaton ka silsila abhi kat jaye
Ishara abroo-e-kham dar ka agar ho jaye
Tadap rahe hain firaq-e-Habib mein aashiq
Ilahi rah-e-Madina ki be-khatar ho jaye
Tere gazab se hon gharat ye dahr ke shaitan
Bane ghulam har ek un mein dar-ba-dar ho jaye
Jo aap chahein to hezam ko dum mein sabz karein
Karam jo aap ka ho khuld ka shajar ho jaye
Khuda ke fazl se har khushk-o-tar pe qudrat hai
Jo chaho to hawa bhi khushk, khushk-tar ho jaye
Ayan hai dabdaba tera samawa se
Hamari kheti bhi sookhi hai pyare tar ho jaye