Pahunchoon Madine kaash! Mein is be-khudi ke saath
Rota phiroon gali gali deewangi ke saath
Aate hain mujh ko yaad woh lamhat-e-khushgawar
Guzre thay Taiba mein jo kabhi murshidi ke saath
Joon hi nigah Gumbad-e-Khizra ko choom le
Qurban meri jaan ho khud-raftagi ke saath
Mujh ko Baqi-e-Pak mein do gaz zameen mile
Yarab! dua hai tujh se meri aajizi ke saath
Allah! mera hashr ho Abu Bakr aur Umar
Usman-e-Ghani-o-Hazrat-e-Maula Ali ke saath
Palte ga paak ho ke dar-e-Mustafa se woh
Pahunche ga jo gunahon ki aaloodgi ke saath
Har ek gunah-gar pukare ga hashr mein
Aqa ko ashkbar bari bebasi ke saath
Mahshar mein mujh ko joon hi nazar aayenge Huzoor
Qadmon mein lot jaoon ga wariftagi ke saath
Yarab! tere karam se jagah khuld mein mile
Mujh ko Rasool-e-Pak ki hamsayegi ke saath
Woh yaar-e-ghaar bhi hain toh yaar-e-mazar bhi
Abu Bakr aaj bhi hain har dam Nabi ke saath
Rooti bhi jo ki aur bichona pathai ka
Karte guzar woh bari saadgi ke saath
Faizan-e-Ghaus-e-Pak palareeb hai sab ke sab
Attariyon ke saath hai har Qadri ke saath
Aisa karam ho nekiyon mein dil laga kare
Parhta rahoon gar namaz bhi toh be-dili ke saath
Ae Zuljalal tujh se mere do sawal hain
Taiba mein maut, zindagi guzre khushi ke saath
Ek baar muskura ke mujhe dekh lijiye
Dam tor doon ga qadmon mein wariftagi ke saath
Mayoos kyun ho aasiyo! tum hausla rakho
Rab ki ata se un ka karam hai sabhi ke saath
Khutba, azaan, namaz, ibadat koi si ho
Zikr-e-Nabi zaroor hai har bandagi ke saath
Tum madani qafilon mein ae Islami bhaiyo!
Karte raho hamesha safar khush-dili ke saath
Apnaye jo sada ke liye Sunnat-e-Nabi
Meri dua hai khuld mein jaye Nabi ke saath
Islami bhai, 'Dawat-e-Islami' ka sada
Tum madani kaam karte raho tundahi ke saath
Sarkar hazri ho Madine ki baar baar
Attar ki hai arz bari aajizi ke saath