Parhoon woh matla-e-Noori sana-e-Mehr-e-Anwar ka

پڑھوں وہ مطلعِ نوری ثنائے مہرِ انور کا ہو جس سے قلبِ روشن جیسے مطلع مہرِ محشر کا سرِ عرشِ عُلا پہنچا قدم جب میرے سرور کا زبانِ قدسیاں پر شور تھا اللہ اکبر کا بنا عرشِ بریں مسندِ کفِ پائے منور کا خدا ہی جانتا ہے مرتبہ سرکار کے سر کا دو عالم صدقہ پاتے ہیں مرے سرکار کے دَر کا اسی سرکار سے ملتا ہے جو کچھ ہے مقدر کا بڑے دربار میں پہنچایا مجھ کو میری قسمت نے میں صدقے جاؤں کیا کہنا مرے اچھے مقدر کا ہے خشک و تر پہ قبضہ جس کا وہ شاہِ جہاں یہ ہے یہی ہے بادشاہِ بَر کا یہی سلطانِ سمندر کا مٹے ظلمتِ جہاں کی نور کا تڑکا ہو عالم میں نقاب روئے انور اے مرے خورشیدِ اب سر کا ضیاء بخشی تری سرکار کی عالم پہ روشن ہے مہ و خورشید صدقہ پاتے ہیں پیارے ترے دَر کا نگاہِ مہر سے اپنی بنایا مہرِ ذرّوں کو الٰہی نورِ دُونا ہو مہرِ ذرّہ پرور کا طبق پر آسماں کے لکھتا میں نعتِ شہِ والا قلم اے کاش مل جاتا مجھے جبریل کے پر کا مقابل ان کے ذرّہ کے ذرا منہ نکل آیا بہت شہرہ سنا کرتے تھے ہم خورشیدِ محشر کا جمالِ حق نما دیکھیں عیاں نورِ خدا پائیں کلیم آئیں ہٹا دیکھیں ذرا پردہ ترے در کا نہ سایہ روح کا ہرگز نہ سایہ نور کا ہرگز تو سایہ کیسا اس جانِ جہاں کے جسمِ انور کا وہ آئینہ اگر دیکھیں تو اپنے آپ کو دیکھیں کہاں ہے آئینہ میں اور کوئی ان کے برابر کا محال عقل ہے ترا مماثل اے مرے سرور تو ہم کر نہیں سکتا ہے عاقل تیرے ہم سر کا خدا شاہد رضا کا آپ کی طالب خدا ہوگا تَعَالٰی اللہ رُتبہ میرے حامی میرے یاور کا دبا جاتا پِجا جاتا ہوں میں آقا دہائی ہے یہ بھاری بوجھ عصیاں کا مرے سر کا ذرا سر کا بجھے گی شربتِ دیدار ہی سے تشنگی اپنی تمہاری دید کا پیاسا ہوں یوں پیاسا ہوں کوثر کا زبان پر جم گئے کانٹے ہے سارا حلق خشک اپنا شہیدِ کربلا کا صدقہ دو اِک جامِ کوثر کا کمی کچھ بھی خزانے میں تمہارے ہو نہیں سکتی تمہیں حق نے عطا فرما دیا جب چشمہ کوثر کا جو آب و تاب دندانِ مُنوّر دیکھ لوں نوری مرا بحرِ سخن سر چشمہ ہو خوش آب گوہر کا