Subh-e-Taiba Mein Hui Bata Hai Baara Noor Ka

صبحِ طیبہ میں ہوئی بٹا ہے باڑا نور کا صدقہ لینے نور کا آیا ہے تارا نور کا باغِ طیبہ میں سہانا پھول پھولا نور کا مست بو ہیں بلبلیں پڑھتی ہیں کلمہ نور کا بارہویں کے چاند کا مجرا ہے سجدہ نور کا بارہ برجوں سے جھکا ایک اک ستارہ نور کا ان کے قصرِ قدر سے خُلد ایک کمرہ نور کا سدرہ پائیں باغ میں ننھا سا پودا نور کا عرش بھی فردوس بھی اس شاہ والا نور کا یہ متمّن بُرج وہ مِشکوۃِ اعلیٰ نور کا آئی بدعت چھائی ظلمت رنگ بدلا نور کا ماہِ سنّت مہرِ طلعت لے لے بدلا نور کا تیرے ہی ماتھے رہا اے جانِ سہرا نور کا بختِ جاگا نور کا چمکا ستارا نور کا میں گدا تو بادشاہ بھر دے پیالہ نور کا نور دن دُونا ترا دے ڈال صدقہ نور کا تیری ہی جانب ہے پانچوں وقت سجدہ نور کا رُخ ہے قبلہ نور کا ابرو ہے کعبہ نور کا پُشت پر ڈھلکا سرِ انور سے شملہ نور کا دیکھیں موسیٰ طور سے اترا صحیفہ نور کا تاج والے دیکھ کر تیرا عمامہ نور کا سر جھکاتے ہیں الٰہی بول بالا نور کا بینی پُرنور پر رخشاں ہے بُکہ نور کا ہے لِوَاءُ الْحَمْد پر اُڑتا پھریا نور کا مُصحفِ عارض پہ ہے خَطِ شفیعہ نور کا لو سیہ کارو مبارک ہو قبالہ نور کا آبِ زر بنتا ہے عارض پر پسینہ نور کا مُصحفِ اعجاز پر چڑھتا ہے سونا نور کا پیچ کرتا ہے فدا ہونے کو لَمْعہ نور کا گردِ سر پھرنے کو بنتا ہے عمامہ نور کا ہَیبتِ عارض سے تھراتا ہے شعلہ نور کا کَفش پا پر گر کے بن جاتا ہے گپھا نور کا شمعِ دل مِشکٰوۃ تن سینہ زُجاجہ نور کا تیری صورت کے لئے آیا ہے سورہ نور کا میل سے کس درجہ ستھرا ہے وہ پتلا نور کا ہے گلے میں آج تک کورا ہی گرتا نور کا تیرے آگے خاک پر جھکتا ہے ماتھا نور کا نور نے پایا ترے سجدے سے سیما نور کا تو ہے سایہ نور کا ہر عُضو ٹکڑا نور کا سایہ کا سایہ نہ ہوتا ہے نہ سایہ نور کا کیا بنا نامِ خدا اسرا کا دولہا نور کا سر پہ سہرا نور کا بر میں شہانہ نور کا بزمِ وَحْدَت میں مزا ہوگا دوبالا نور کا ملنے شمعِ طور سے جاتا ہے اِکّا نور کا وصفِ رُخ میں گاتی ہیں حوریں ترانہ نور کا قدرتی بینوں میں کیا بجتا ہے لہرا نور کا یہ کتاب کُن میں آیا ہے طرفہ آیہ نور کا غیر قائل کچھ نہ سمجھا کوئی معنیٰ نور کا دیکھنے والوں نے کچھ دیکھا نہ بھالا نور کا مُن٘ہ رائی کیسا یہ آئینہ دکھایا نور کا صبح کر دی کفر کی سچا تھا مُژدہ نور کا شام ہی سے تھا شبِ تیرہ کو دھڑکا نور کا پڑتی ہے نوری بھرن اُمڈا ہے دریا نور کا سر جھکا اے رُشتِ کفر آتا ہے اہلِ نور کا ناریوں کا دور تھا دل جل رہا تھا نور کا تم کو دیکھا ہو گیا ٹھنڈا کلیجا نور کا نَسخِ اَدیاں کر کے خود قبضہ بٹھایا نور کا تاجور نے کر لیا کچا علاقہ نور کا جو گدا دیکھو لیے جاتا ہے توڑا نور کا نور کی سرکار ہے کیا اس میں توڑا نور کا بھیک لے سرکار سے لا جلد کاسہ نور کا ماہِ نو طیبہ میں بٹا ہے مہینہ نور کا دیکھ ان کے ہوتے نازیا ہے دعوٰی نور کا مہر لکھ دے یاں کے ذروں کو مِچکا نور کا یاں بھی داغِ سجدۂ طیبہ ہے تمغا نور کا اے قمر کیا تیرے ہی ماتھے ہے ٹیکا نور کا شمع ساں ایک ایک پروانہ ہے اس با نور کا نورِ حق سے لو لگائے دل میں رشتہ نور کا اَنجمن والے ہیں اَنجم بزمِ حلقہ نور کا چاند پر تاروں کے جھرمٹ سے ہے ہالہ نور کا تیری نسلِ پاک میں ہے بچہ بچہ نور کا تو ہے عینِ نور تیرا سب گھرانا نور کا نور کی سرکار سے پایا دوشالہ نور کا ہو مبارک تم کو ذوالنورین جوڑا نور کا کس کے پردے نے کیا آئینہ اندھا نور کا مانگتا پھرتا ہے آنکھیں ہر نگینہ نور کا اب کہاں وہ تابشیں کیسا وہ ترکا نور کا مہر نے چھپ کر کیا خاصا ڈھنڈلکا نور کا تم مقابل تھے تو پہروں چاند بڑھتا نور کا تم سے چھٹ کر منھ نکل آیا ذرا سا نور کا قبر انور کہیے یا قصرِ مُعلّیٰ نور کا چرخِ اطلس یا کوئی سادہ سا قبہ نور کا آنکھ مل سکتی نہیں در پر ہے پہرا نور کا تاب ہے بے حکم پر مارے پرندہ نور کا نزع میں لوٹے گا خاکِ در پہ شیدا نور کا مر کے اوڑھے گی عروسِ جاں دوپٹا نور کا تابِ مہرِ حشر سے چونکے نہ کشتہ نور کا بوندیاں رحمت کی دینے آئیں چھینٹا نور کا وضعِ واضع میں تری صورت ہے معنیٰ نور کا یوں مجازاً چاہیں جس کو کہہ دیں کلمہ نور کا انبیاء اَجزا ہیں تو بالکل ہے جملہ نور کا اس علاقے سے ہے اُن پر نام سچا نور کا یہ جو مہر و مہ پہ ہے اطلاق آتا نور کا بھیک تیرے نام کی ہے استعارۂ نور کا سُر میں آنکھیں حریمِ حق کے وہ مُشکلیں غزال ہے فضائے لامکاں تک جن کا رَمنا نور کا تابِ حُسنِ گرم سے کھل جائیں گے دل کے گنول نو بہاریں لائے گا گرمی کا جھلکا نور کا ذَرّے مہرِ قدس تک تیرے توسُّط سے گئے حدِ اَوسط نے کیا صُغریٰ کو کبریٰ نور کا سبزۂ گردوں جھکا تھا بہرِ پا بوسِ بُراق پھر نہ سیدھا ہو سکا کھایا وہ کوڑا نور کا تابِ سم سے چوندھیا کر چاند اُٹھیں قدموں پھرا ہنس کے بجلی نے کہا دیکھا چھلاوا نور کا دیدِ نقشِ سُم کو نکلی سات پردوں سے نگاہ پتلیاں بولیں چلو آیا تماشا نور کا عکسِ سم نے چاند سورج کو لگائے چار چاند پڑ گیا سیم و زرِ گردوں پہ سکہ نور کا چاند جھک جاتا جدھر انگلی اٹھاتے مہد میں کیا ہی چلتا تھا اشاروں پر کھلونا نور کا ایک سینہ تک مُشابہ اک وہاں سے پاؤں تک حُسنِ سبطین ان کے جاموں میں ہے نیما نور کا صاف شکلِ پاک ہے دونوں کے ملنے سے عیاں خطِ توآم میں لکھا ہے یہ دو ورقہ نور کا کج گیسو دہن مئی ابرو آنکھیں ع ص تہیعص اُن کا ہے چہرہ نور کا اے رضا یہ احمدِ نوری کا فیضِ نور ہے ہوگئی میری غزل بڑھ کر قصیدہ نور کا