Un ko dekha to gaya bhool mein gham ki surat
Yad bhi ab to nahin ranj o alam ki surat
Khwab mein dekhun agar dafe-gham ki surat
Phir na waqya ho kabhi ranj o alam ki surat
Aable paon mein par jayen jo chalte chalte
Rah-e-Taiba mein chalun sar se qadam ki surat
Tum agar chaho to ek cheen o jabeen se apni
Kardo aada ko qalam shakh-e-qalam ki surat
Nam wala tera aye kaash misal-e-majnoo
Reg par ungliyon se likhun qalam ki surat
Tera deedar kare reham mujassam tera
Dekhni ho jise Rehman ke karam ki surat
Aap hain shan-e-karam kaan-e-karam jaan-e-karam
Aap hain fazl-e-atam lutf-e-aam ki surat
Ek ishara tere abru ka shah har dusra
Kaat de dushmano ko tegh-e-do-dam ki surat
Aap ka misl-e-shah kaise nazar mein aaye
Kis ne dekhi hai bhala ahl-e-adam ki surat
Mom hai un ke qadam ke liye dil patthar ka
Sang ne dil mein rakhi un ke qadam ki surat
Khwab mein bhi na nazar aaye agar tum chaho
Dard-o-gham, ranj-o-alam, zulm-o-sitam ki surat
Ae sahab-e-karam ek boond karam ki par jaye
Safha-e-dil se mere mahw ho gham ki surat
Jab se sookhe hain mere kisht-e-amal bagh-e-amal
Yad aati hai mujhe abr-e-karam ki surat
Safha-e-dil pe mere naam-e-Nabi kunda ho
Naqsh ho dil pe mere un ke alam ki surat
Teri tasveer khinche rooh munawwar kyon kar
Kaise khinche koi misbah-e-zulm ki surat
Aayein jo khwab mein woh ho shab-e-gham eid ka din
Jayein to eid ka din ho shab-e-gham ki surat
Jayein gulshan se to lut jaye bahar-e-gulshan
Dasht mein aayein to ho dasht-e-iram ki surat
Bheer ko khauf na ho sher se jo tum chaho
Tum jo chaho to bane sher-e-ghanam ki surat
Koh ho jayein agar chaho to sona chandi
Sangreze banein dinar-o-dirham ki surat
Surat-e-pak woh be-misl hai payi tum ne
Jis ki sani na arab aur na ajam ki surat
Dam nikal jaye mera rah mein un ki Noori
Un ke kooche mein rahoon naqsh-e-qadam ki surat