Ya Khuda Hajj pe bula aake main Kaba dekhun

Ya Khuda! Hajj pe bula aake main Kaba dekhun Kash! Ek baar main phir meetha Madina dekhun Phir muyassar mujhe kash! Wuqoof-e-Arafat Jalwa main Muzdalifa aur Mina ka dekhun Jhoom kar khoob karoon khana-e-Kaba ka tawaf Phir Madine ko chaloon Gumbad-e-Khizra dekhun Sabz Gumbad ka haseen jalwa dikha de Ya Rabb! Masjid-e-Nabvi ka pur-noor manara dekhun Roza-e-Paak ke saye mein bula kar Aaqa Ankh de dijiye main Aap ka jalwa dekhun Choom loon kash! Nigahon se sunehri jaali Ashkbar ankh se minbar ka bhi jalwa dekhun Kash! Woh ankh ata ho main Madine aakar Jis taraf jaoon udhar noor barasta dekhun Jaam-e-Ishq aisa pila dijiye Jaan-e-Aalam Har ghadi aahein bharoon khud ko tadapta dekhun Chashm-e-tar soz-e-jigar dijiye qalb-e-muztar Ishq mein rota rahoon jab bhi Roza dekhun Soz-e-Ishq mein jalta hi rahoon main har dam Ankh se gham mein tere khoon barasta dekhun Us pe rashk aata hai aur pyaar bahut aata hai Ishq mein tere jise rota bilakta dekhun Kash! Main rone lagoon qalb bhi ho mera udaas Jab Madine ki taraf qafila jaata dekhun Zairo! Kehna ye ro ro ke Shaha! Ek maskeen Keh raha tha ye tadap kar: 'Main Madina dekhun' Tu jo chahe to meri ankh se parde uthein Main watan se bhi Madine ka nazara dekhun Woh khilate hain pilate hain nibhate bhi hain Kyun kahin jaoon kisi aur taraf kya dekhun Apni rehmat se mujhe kar do ata aisi bahaar Munh kabhi bhi na duwan ka mere Aaqa! Dekhun Tere ehsan karodon hain ye bhi ehsan Ya Khuda! Naz'a mein jalwa main Nabi ka dekhun Baagh-e-Jannat mein jo aao apna ata farma do Khuld mein har ghadi jalwa main tumhara dekhun Dod kar qadmon mein Attar karoon us dam Hashr mein jis ghadi Sarkar ko aata dekhun ------------------------------------ Mera dil Madina