Aah pura mere dil ka kabhi arman hoga

آہ پورا مرے دل کا کبھی ارمان ہوگا کبھی دل جلوہ گہِ سرورِ خوباں ہوگا میرے دل پر جو کبھی جلوۂ جاناں ہوگا لمعۂ نور مرے رُخ سے نمایاں ہوگا جلوۂ مُصحفِ رُخ دل میں جو پنہاں ہوگا پارے پارے میں مرے قلب کے قرآں ہوگا چوندھ جائے گی تری آنکھ بھی مہرِ محشر ان کے ذرّہ کو جو دیکھے گا پریشاں ہوگا دیکھ مت دیکھ مجھے گرم نظر سے خاور شوخیٔ چشم سے تو آپ پریشاں ہوگا حُسن وہ پایا ہے خورشیدِ رسالت تُو نے تیرے دیدار کا طالب مہِ کنعاں ہوگا جلوہِ حُسنِ جہاں تاب کا کیا حال کہوں آئینہ بھی تمہیں دیکھ کے حیراں ہوگا کون پوچھے گا بھلا روزِ جزا وہ بھی مجھے اُن کی رحمت کے سوا کوئی پُرساں ہوگا چاکِ تقدیر کو کیا سوزنِ تدبیر سے لاکھ وہ بخیہ کرے چاکِ گریباں ہوگا مجھ کو دعوٰی نہیں عِصمت کا مگر بے موقع عیب جوئی نہ کرے گا جو سُخن داں ہوگا دلِ دشمن کے لیے تیغِ دو پیکر ہے سُخن چشمِ حاسد کو مرا شعر نمک داں ہوگا عمر ساری تو کٹی آہو میں اپنی نوری کب مدینے کی طرف کوچ کا ساماں ہوگا