Achanak dushmanon ne ki charhai Ya Rasool Allah
Hue do jaan bahaq islami bhai Ya Rasool Allah
Mara dushman to mujh ko khatam karne aa hi pohancha tha
Main qurban tum ne meri jaan bachai Ya Rasool Allah
Shaheed-e-Dawat-e-Islami Sajjad o Ahad Aaqa
Rahein jannat mein yakja dono bhai Ya Rasool Allah
Adu jhuk maarta hai khaak urata hai tere qurban
Mujhe ab tak na koi aanch aayi Ya Rasool Allah
Nahi Sarkar! Zaati dushmani meri kisi se bhi
Buri hai nafs o shaitan se larai Ya Rasool Allah
Shahan! Dushman hua haaye! Hamare khoon ka pyasa
Duhai Ya Rasool Allah! Duhai Ya Rasool Allah
Hifazat dushmanon se aap hi farmaye Aaqa
Ke mujh kamzor par ki hai charhai Ya Rasool Allah
Muqabil dushman-e-Islam ke aisa bana goya
Koi deewar ho seesa pilai Ya Rasool Allah
Tehi hai jurm mera sunnaton ka adna khadim hoon
Hai main ne sunnaton se lo lagai Ya Rasool Allah
Agar chah lakh dushman dhamkiyan de jaan lene ki
Kisi se kyun dare tera fadai Ya Rasool Allah
Agar chah jaan jaye khidmat-e-sunnat na chhoroon ga
Shahan! Karte rahein mushkil kushai Ya Rasool Allah
Kisi surat bhatak sakta nahi main rah-e-sunnat se
Mujhe hasil hai teri rehnumai Ya Rasool Allah
Hidayat dushmanon ko ya Nabi! Aisi ata kar do
Yeh ban jayen mere islami bhai Ya Rasool Allah
Tamanna hai mere dushman karein tauba ata kar do
Unhein dono jahan ki tum bhalai Ya Rasool Allah
Bachalo! Naar-e-dozakh se bechare hasidon ko bhi
Main kyun chahoon kisi ki bhi burai Ya Rasool Allah
Huqooq apnay kiye hain darguzar dushman ko bhi saray
Agar chah mujh pe ho goli chalai Ya Rasool Allah
Baharsurat mujhe marna paray ga par sa'adat hai
Shahadat rah-e-sunnat mein jo payi Ya Rasool Allah
Andheri qabr se Shah-e-Madina khauf aata hai
Nazar mein hai rehmat par jamai Ya Rasool Allah
Tamanna hai tere Attar ki yun dhoom mach jaye
Madine mein shahadat is ne payi Ya Rasool Allah