Afsos waqt-e-rukhsat nazdeek aa raha hai
Ik hook uth rahi hai dil baitha ja raha hai
Dil mein khushi thi kaisi jab main chala tha ghar se
Dil gham ke gehre darya mein dooba ja raha hai
Hai furqat-e-Madina se chaak chaak seena
abr-e-siyah-e-gham ka ab dil pe chha raha hai
Aankh ashqbar hai ab dil be-qarar hai ab
Dil ko judai ka gham ab khoon rula raha hai
Kyun sabz sabz gumbad par ho gaya na qurban
Ae za'ir-e-Madina! tu bhool kha raha hai
Afsos! chand ghariyan Taiba ki reh gayi hain
Dil mein judai ka gham tufan macha raha hai
Kuch bhi na kar saka hoon haye adab yahan ka
Ye gham mere kaleje ko kaat kha raha hai
Ab ruh bhi hai maghmum aur jaan bhi hai hairan
Badal gham-o-alam ka har simt chha raha hai
Maut aap ki gali ki behtar hai zindagi se
Haye muqaddar in ka dar kyun chura raha hai
Afsos chal diya hai ab qafila hamara
Har ek gham ka mara aansu baha raha hai
Dil khoon ro raha hai aansu chalak rahe hain
Meri nazar se Taiba ab chhupta ja raha hai
Aah! Al-firaq Aqa! Aah! Al-wida Maula
Ab chhor kar Madina Attar ja raha hai