Ek baar phir Madine Attar ja rahe hain

Ek baar phir Madine Attar ja rahe hain Aqaa Madine wale dar par bula rahe hain Qismat ko is tasawwur se wajd aa raha hai Rahmat ki bheek dene Aqaa bula rahe hain Woh faiz ka khazana har dam luta rahe hain Anwar har taraf hi Taiba mein chha rahe hain Jo koi un ke gham mein aansu baha rahe hain Jeene ka lutf aise ush-shaq pa rahe hain Jis dam Madine aayen royen pichren khayen Hum maang tum se Aqaa aisi ada rahe hain Husn-e-amal hamare palle mein kuch nahi hai Aahon ki aansuon ki saugaat la rahe hain Manzar hai rooh parwar rozay ki jaaliyon par Ush-shaq aansuon ke moti luta rahe hain Aqaa! hamein ye aankhein bas aap hi ke gham mein Haaye hamein zamane ke gham rula rahe hain Izn-e-Khuda se ho tum mukhtar-e-har do-aalam Donon jahan tumhari khairaat kha rahe hain Dastoor hai ke jis ka khana usi ka gana Hum jis ka kha rahe hain geet us ke ga rahe hain Maskan bane Madina madfan bane Madina Ahmed Raza ka tum ko dete wasta rahe hain Aqaa! bulao un ko be-chain muztarib jo Dil ko jala rahe hain aansu baha rahe hain Jin ka na bhaao koi duniya mein poochta ho Seena se un ko Aaqa apne laga rahe hain Ummat ke haal se hain aagah har ghari Aap Khwabon mein aa rahe hain bigri bana rahe hain Duniya ke gham ne maara lillah do sahara Sarkar thokarain hum dar dar ki kha rahe hain Ab gher chuki hai Aaqa toofan mein apni naiya Ae Nakhuda sahara maang Aap ka rahe hain Aqaa Huzoor-e-Anwar! Nazar-e-karam ho hum par Abr-e-siyah-e-dil par isyaan ke chha rahe hain Chashm-e-karam ho jaana su-e-gunahgaaran Sarkar! Nafs-o-shaitan har dam daba rahe hain Un sab muballighon ke khwabon mein ab karam ho Aqaa jo sunnaton ki khidmat baja rahe hain Parwardigar-e-aali de jazba-e-Ghazali Kar hum ko khush khisaali kar ye dua rahe hain Bemari-e-gunah se hum ko shifa de ya Rabb Ban jayain nek hum sab iltija rahe hain Daulat ki hirs dil se Allah door kar de Ishq-e-Rasool de de kar ye dua rahe hain Takseer-e-maal-o-zar ki hargiz nahin tamanna Hum maang Aap se bas gham Aap ka rahe hain Rukhsat ki ab ghari hai sar par ajal khari hai Aajaao ab khudara hum jaan se ja rahe hain Ab lahad mein azizo! jaldi utaar bhi do Aaha! woh muskurate tashreef la rahe hain Faryad-e-jaan aalam! koi nahin hai hamdam Su-e-Saqar farishtay ab le ke ja rahe hain Qurban roz-e-mehshar daaman ka parda dhak kar Aibon ko mere Sarwar khud hi chupa rahe hain Mehshar mein Banda Parwar lutf-o-karam ke paikar Bhar bhar ke jaam-e-Kausar hum ko pila rahe hain Sadqe mein Murtaza ke soz-e-Bilal de do Ye arz le kar Aaqa Attar aa rahe hain Un ke karam ke sadqe fazl-o-karam pe qurban Attar ko woh le kar jannat mein ja rahe hain