Farogh-e-akhtar-e-badr aftab-e-jalwa-e-aariz
Ziya-e-tala-e-badr un ka abru-e-hilali hai
Woh hain Allah wale jo tujhe wali kahein apna
Ke tu Allah wala hai tera Allah wali hai
Sahare ne tere gesu ke phera hai balaon ko
Ishare ne tere abru ke aayi maut tali hai
Nigah ne teer-e-rehmat ke dil-e-ummat se kheenche hain
Muzha ne phans-e-hasrat ki kaleja se nikali hai
Faqeero be nawaon apni apni jholiyan bhar lo
Ke bara bat raha hai faiz-e-sarkar-e-aali hai
Tujhi ko khilat-e-yaktayi-e-alam mila haq se
Tere hi jism par mauzoon qaba-e-be misali hai
Nikala kab kisi ko bazm-e-faiz-e-aam se tum ne
Nikali hai to aane walon ki hasrat nikali hai
Dam-e-hashr aasi mazay le rahe hain
Shafa'at kisi ki hai rehmat kisi ki
Rahe dil kisi ki mohabbat mein har dam
Rahe dil mein har dam mohabbat kisi ki
Tera qabza kaunain o ma fee-hima par
Hui hai na ho yun hukumat kisi ki
Khuda ka diya hai tere paas sab kuch
Tere hote kya hum ko haajat kisi ki
Zamana ki daulat nahi paas phir bhi
Zamana mein bant'ti hai daulat kisi ki
Na pahunchein kabhi aql-e-kul ke farishtay
Khuda jaanta hai haqeeqat kisi ki
Hamara bharosa hamara sahara
Shafa'at kisi ki himayat kisi ki
Qamar ek ishaaray mein do tukray dekha
Zamana pe roshan hai taqat kisi ki
Hamein hain kisi ki shafa'at ki khatir
Hamari hi khatir shafa'at kisi ki
Musibat zada shad ho tum ke un se
Nahi dekhi jaati musibat kisi ki
Na pahunchein ge jab tak gunahgar un ke
Na jaye gi jannat mein ummat kisi ki
Ham aise gunahgar hain zuhd walo
Hamari madad par hai rehmat kisi ki
Madina ka jungle ho aur hum hon zahid
Nahi chahiye hum ko jannat kisi ki
Hazaron hon khursheed-e-mahshar to gham kya
Yahan saya-e-gushtar hai rehmat kisi ki
Bharey jayenge khuld mein ahl-e-isiyan
Na jaye gi khali shifa'at kisi ki
Wahi sab ke maalik unhi ka hai sab kuch
Na aasi kisi ke na jannat kisi ki
Raf'ana laka zikrak par tasadduq
Sab oonchon se oonchi hai rif'at kisi ki
Utarne lage Ma ramayta yadullah
Charhi aisi zoron pe taqat kisi ki
Gada khush hon khair-e-luk ki sada hai
Ke din duni hai barhti daulat kisi ki
Fatarza ne dali hain baahein gale mein
Ke ho jaye raazi tabiyat kisi ki
Khuda se dua hai ke hungam-e-rukhsat
Zaban-e-Hasan par ho midhat kisi ki