Hajiyon ke ban rahe hain qafilay phir Ya Nabi, phir nazar mein phir gaye hajj ke manazir Ya Nabi.
Kar rahe hain janay walay hajj ki ab tayariyan, reh na jaon main kahin kar do karam phir Ya Nabi.
Aah! palay zar nahi rakht-e-safar sarwar nahi, tum bula lo tum bulanay par ho qadir Ya Nabi.
Kis qadr tha khush mujhe jab pesh aaya tha safar, mujh ko ab ki baar bhi bulwaiye phir Ya Nabi.
Dil mera ghamgeen hai aur jaan bhi hai muztarib, Murshadi ka wasta bulwaiye phir Ya Nabi.
Gham ke badal chha rahay hain aah! meray qalb par, haziri ki do ijazat mujh ko tum phir Ya Nabi.
Gumbad-e-Khazra ke jalway dekhnay kab aaon ga, kab tak ab tarpaogay tum mujh ko aakhir Ya Nabi.
Aap hi asbab Aaqa phir muhayya kijiye, phir dikha dijiye Madinay ke manazir Ya Nabi.
Kis tarah taskeen doon ga main dil-e-ghamgeen ko, reh gaya gar haziri se main jo qasir Ya Nabi.
Mujh pe kya guzray gi Aaqa! is baras gar reh gaya, mera haal-e-dil to hai sab tum pe zahir Ya Nabi.
Aah! Tayyaba se agar main door reh kar mar gaya, rooh bhi ranjoor hogi kis qadr phir Ya Nabi.
Misl-e-sabiq is baras bhi kijiye nazar-e-karam, main guzishta saal aaya tha bil-aakhir Ya Nabi.
Jo Madinay ke liye rehtay hain Aaqa be-qarar, woh bhi ho jayain teray rozay pe hazir Ya Nabi.
Chaak seena chaak dil soz-e-jigar aur chashm-e-tar, dijiye mujh ko tufail-e-Abd-e-Qadir Ya Nabi.
Yaqeen Quran azmat par tumhari hai gawah, Shahid-o-Qasim ho tum Tayyab ho Tahir Ya Nabi.
Tum ko ilm-e-ghaib Maula ne ata farmaya
Kar diya har ja pe hazir aur nazir Ya Nabi!
Istaqamat deen par mujh ko ata farmaye
Ya Rasool-Allah baraye Aal-e-Yasar! Ya Nabi!
Aap sab nabiyon mein afzal aur main badkaar aah!
Asiyon mein hoon yagana aur nadir Ya Nabi!
Asi o badkar ke apne Khuda-e-Pak se
Bakhshwa do sab saghair aur kabair Ya Nabi!
Baal bhi beeka na mera to koi kar payega
Kyun ke mere tum ho hami aur nasir Ya Nabi!
Tishnagan-e-deed ko ho deed ka sharbat ata
Az tufail-e-Ghaus-e-Azam Abdul Qadir Ya Nabi!
Aah! Mera kya banega gar na Hajj par ja saka
Ho karam Attar par ho jaye hazir Ya Nabi!