Jo Bhi Sarkar Ka Ashiq-e-Zar Hai Us Ki Thokar Pe Daulat Ka Anbar Hai
Saltanat Se Use Kya Sarokar Hai Wasta-e-Iqtidar Us Ke Bekar Hai
Jo Ke Deewana Shah-e-Abrar Hai Jis Ka Dil Un Ki Ulfat Se Sarshar Hai
Un Ki Sunnat Ka Jo Aaina Dar Hai Bas Wahi To Jahan Mein Samajhdar Hai
Atish-e-Shauq Mein Kash! Jalta Rahoon Aur Khayal-e-Madina Mein Khoya Rahoon
Bas Madina Madina Hi Karta Rahoon Yeh Dua Meri Ae Rab-e-Ghaffar Hai
Door Dunya Ke Hojayen Ranj-o-Alam Mujh Ko Mil Jaye Baithe Madine Ka Gham
Ho Karam Ho Ya Khuda Ho Karam Wasta Us Ka Jo Shah-e-Abrar Hai
Aah! Asiyan Ke Tufan Mein Jaan Chaman Phans Gaya Hai Safina Ae Shah-e-Zaman
Bas Tumhein Ek Umeed Ki Ho Kiran Tum Jo Chaho To Bera Mera Paar Hai
Ro Raha Hai Yeh Jo Hichkiyan Bandh Kar Yaad Aaya Hai Is Ko Nabi Ka Nagar
Kya Karo Ge Tabibo! Use Dekh Kar Chhor Do Yeh Madine Ka Beemar Hai
Baithe Baithe Madine Ki Mehki Faza Har Musalman Ko Ya Ilahi! Dikha
Us Shah-e-Karbala Ka Tujhe Wasta Jo Jawan-e-Jannat Ka Sardar Hai
Aah! Ranj-o-Alam Ki Nahi Koi Had Kaam Karti Nahi Ab To Aql-o-Khirad
Almadad aye mere rahnuma Almadad paon zakhmi hain aur raah pur-khaar hai
Mujh ko soz-e-Bilal aur soz-e-Raza de do soz-e-Owais aur soz-e-Ziya
Wasta tujh ko Aqa usi Ghaus ka Awliya ka jo Sultan-o-Sardar hai
Bhar ke jate hain mangte jahan jholiyan bhool jate hain gham gham ke mare jahan
Jis jagah dushmano ne bhi payi amaan mere baithe Nabi ka wo darbar hai
Wo Habib-e-Khuda Sarwar-e-Ins-o-Jaan jis ke zer-e-tasarruf hain dono jahan
Us pe qurban dil us pe qurban jaan jo Khuda ki khudai ka mukhtar hai
Aye muqaddar ki roothi hawao suno! Haal-e-dil par na yun muskurao suno!
Aandhiyo! Gardisho! Tum bhi aao suno! Mustafa mera hami-o-ghamkhwar hai
Toote go sar pe koh-e-bala sabr kar aye muballigh na tu dagmaga sabr kar
Lab pe harf-e-shikayat na la sabr kar haan yahi sunnat-e-Shah-e-Abrar hai
Ya Habib-e-Khuda mujh pe chashm-e-ata kar do tum az paye Ghaus-o-Ahmed Raza
Le kar umeed-e-afw-o-karam Sarwar-e-dar pe hazir tumhara gunahgar hai
Khwah daulat na de koi sarwat na de chahe izzat na de koi shohrat na de
Takht-e-shahi na de aur hukumat na de
Tujh se Attar tera talabgar hai