Kis ke dar pe mein jaunga Maula gar tu naraz ho gaya Ya Rab
Waqt-e-ruhlat ab aa gaya Maula jalwa-e-Mustafa dikha Ya Rab
Qabr mein aah! ghup andhera hai roshni ho paye Raza Ya Rab
Sanp laptein na mere lashe se qabr mein kuch na de saza Ya Rab
Noor-e-Ahmad se qabr roshan ho wehshat-e-qabr se bacha Ya Rab
Haye! husn-e-amal nahi palle hashr mein mera ho kya Ya Rab
Garmi-e-hashr, pyas ki shiddat jaam-e-Kauthar mujhe pila Ya Rab
Khauf-e-dozakh ka aah! rehmat ho khak-e-Taiba ka wasta Ya Rab
Mera nazuk badan jahannam se az tufail-e-Raza bacha Ya Rab
Talib-e-maghfirat hoon Ya Allah bakhshish-e-Haidar ka wasta Ya Rab
Sab ne thukra diya to kya parwa mujhko tera hai aasra Ya Rab
Zulf-e-mehboob ka bana qaid-e aur hargiz na phir chura Ya Rab
Mushkilon mein de sabr ki tofiq apne gham mein faqat ghula Ya Rab
De de soz-e-Bilal Ya Allah ashkbar aankh ho ata Ya Rab
Aah! aada hain khoon ke pyase dushmanon se mujhe bacha Ya Rab
De shahadat mujhe Madeene mein az paye Shah-e-Karbala Ya Rab
Sabz gumbad ke zer-e-saya ho jaan meri jism se juda Ya Rab
Qabr meri bane Madeene mein tujh se hai yeh meri dua Ya Rab
Hirs-e-dunya nikal de dil se bas rahoon talib-e-Raza Ya Rab
De de "qufl-e-Madina" aankhon ka wasta yaar-e-yaar ka Ya Rab
De de "qufl-e-Madina" lab ka bhi wasta yaar-e-yaar ka Ya Rab
Kash! aadat fazool baton ki door ho az paye Raza Ya Rab
Wasta mere Peer-o-Murshid ka mujhko tu muttaqi bana Ya Rab
Dil ka ujra chaman ho phir aabad koi aisi hawa chala Ya Rab
Har baras kash! aa ke Makke mein lutf uthaun tawaf ka Ya Rab
Jis kisi ne kaha, dua karna, us ka poora ho mudda'a Ya Rab
Kar de Jannat mein tu jawar un ka apne Attar ko ata Ya Rab