Kya Theek Ho Rukh-e-Nabvi Par Misal-e-Gul

کیا ٹھیک ہو رُخِ نبوی پر مثالِ گُل پامالِ جلوۂ کفِ پا ہے جمالِ گُل جنت ہے اُن کے جلوہ سے جویائے رنگ و بو اے گل ہمارے گل سے ہے گل کو سوالِ گل اُن کے قدم سے سلعِ غالیہ ہوئی جناں واللہ میرے گل سے ہے جاہ و جلالِ گُل سُنتا ہوں عشقِ شاہ میں دِل ہوگا خُوں فشاں یارب یہ مُژدہ سچ ہو مبارک ہو فالِ گُل بُلبُلِ حرم کو چِہ غمِ فانی سے فائدہ کب تک کہے ہائے وہ غُنچہ و دلالِ گُل غمگیں ہے شوقِ غازۂ خاکِ مدینہ میں شبنم سے دھل سکے گی نہ گردِ ملالِ گل بلبل یہ کیا کہاں میں کہاں فضلِ گل کہاں اُمید رکھ کہ عام ہے جود و نوالِ گل بلبل! گِھرا ہے ابر و لا مرشدہ ہو کہ اب گرتی ہے آشیانہ پہ برقِ جمالِ گل یارب ہرا بھرا رہے داغِ جگر کا باغ ہر مہ مہ بہار ہو ہر سالِ سالِ گل رنگِ مژہ سے کر کے خجل یادِ شاہ میں کھینچا ہے ہم نے کانٹوں پہ عِطرِ جمالِ گل میں یادِ شہ میں روؤں کریں عنادل ہجوم ہر اشکِ لالہ فام پہ ہو احتمالِ گل ہیں عکسِ چہرہ سے لبِ گلگوں میں سُرخیاں ڈوبا ہے بدرِ گل سے شفق میں ہلالِ گل نعتِ حضور میں مُتَرَنَّم ہے عندلیب شاخوں کے جھومنے سے عیاں وجد و حالِ گل بلبل گلِ مدینہ ہمیشہ بہار ہے دو دن کی ہے بہار فنا ہے مالِ گل شیخین اِدھر نثار، غنی و علی اُدھر غُنچہ ہے بلبلوں کا یمین و شمالِ گل چاہے خدا تو پائیں گے عشقِ نبی میں خلد نکلی ہے نامہِ دلِ پُرخوں میں فالِ گل کر اُس کی یاد جس سے ملے چین عندلیب دیکھا نہیں کہ خارِ اَلَم ہے خیالِ گل دیکھا تھا خواب خارِ حرم عندلیب نے کھٹکا کیا ہے آنکھ میں شب بھر خیالِ گل اُن دو کا صدقہ جن کو کہا میرے پھول ہیں کیجئے رِضا کو حشر میں خنداں مثالِ گل