کیونکر نہ ہو مکے سے سوا شانِ مدینہ
وہ جبکہ ہوا مسکنِ سلطانِ مدینہ
مکے کو شرف ہے تو مدینے کے سبب سے
اس واسطے مکہ بھی ہے قربانِ مدینہ
ہوتا ہے فلک کا سرِ تسلیم یہاں خَم
اللہ رے بلندی تری ایوانِ مدینہ
آتے ہیں سرِ عجز جھکائے ہوئے لاکھوں
شاہانِ جہاں پیشِ گدایانِ مدینہ
بلبل کبھی بھولے سے نہ لے نامِ چمن کا
دیکھا ہی نہیں اس نے گلستانِ مدینہ
لاکھوں نے لگائے ہیں ترے کوچے میں بستر
تھوڑی سی جگہ ہم کو بھی اے جانِ مدینہ
پہنچادے تو محبوب کے در پر مجھے یارب
لے جاؤں نہ دنیا سے ارمانِ مدینہ