Muhammad Mustafa jab hashr mein tashreef layenge
To apne naam lewon ko ishare mein chhurayenge
Jo mehshar mein pukaarenge Aghisni Ya Rasool Allah
To un ki dastgeeri ke liye Sarkar aayenge
Raha hai wird jin ka Ya Rasool Allah duniya mein
Woh mehshar mein tufail-e-Shah-e-Deen inaam payenge
Agarcha khati-o-aasi hain hum lekin yaqeen yeh hai
Rasool Allah hamari hashr mein bigdi banayenge
Jahannam cheekhta jab arsa-e-mehshar mein aayega
Siyah karon ko woh daman-e-rehmat mein chhupayenge
Gunahgaron ki bakhshish ka rahega un ke sar sehra
Shafa'at ka Rasool Allah ko dulha banayenge