Mujh ko Allah se mohabbat hai yeh usi ki ata o rehmat hai
Jis ko sarkar se mohabbat hai us ki bakhshish ki yeh zamanat hai
Dil mein Quran ki mere azmat hai aur pyari har aik sunnat hai
Sab se achi Nabi ki seerat hai chand se bhi haseen surat hai
Mil gayi mujh ko teri nisbat hai yeh sharaf hai bari sa'adat hai
Aal o as-haab se mohabbat hai aur sab auliya se ulfat hai
Yeh sab Allah ki inayat hai mil gayi Mustafa ki ummat hai
Ghous o Khwaja ki dil mein ulfat hai qalb mein ishq-e-Aala Hazrat hai
Marhaba! apni khoob qismat hai peer o murshid ki dil mein chahat hai
Aashiqan-e-Nabi se ulfat hai dushmanan-e-Nabi se nafrat hai
Haye duniya ki dil mein chahat hai nafs ki yeh khuli shararat hai
Na talabgar-e-maal-o-daulat hai, is gada ko karam ki haajat hai
Do jahan mein wahi salamat hai, jis musalman pe Rab ki rehmat hai
Ya Nabi! phans gaya halakat hai, yeh gada saail-e-shafa'at hai
Haq se umeed-e-afw-o-rehmat hai, tere sadqe mein milni jannat hai
Ek arsay se dil mein raghbat hai, su-e-Taiba chaloon yeh hasrat hai
Ek muddat se hijr-o-furqat hai, kya Madine ki ab ijazat hai?
Ah! pallay na kuch tilawat hai, na duroodon ki koi kasrat hai
Ah! isyan ki khoob kasrat hai, Ya Nabi! iltaja-e-rehmat hai
Aisi isyan ki pargayi lat hai, phir wahi baad-e-tauba halat hai
Naik bandon pe Rab ki rehmat hai, har gunah ba'is-e-halakat hai
Aagaya ah! waqt-e-rehlat hai, yeh gada talib-e-ziarat hai
Aankh nam hai na kuch nadamat hai, ah! a'maal ki yeh shamat hai
Maot sar par hai tujh pe hairat hai, jaag kyun mehv-e-khwab-e-ghilat hai
Teri Attar kya haqeeqat hai, jo hai Sarkar ki badaulat hai