Noor wala aaya hai, haan noor lekar aaya hai
Saare aalam mein yeh dekho noor kaisa chhaya hai
Chaar jaanib roshni hai sab samaan hai noor noor
Haq ne paida aaj apne pyare ko farmaya hai
Aao aao noor ki khairat lene ko chalein
Noor wala Aamina bibi ke ghar mein aaya hai
Aage peeche dayein bayein noor hai charon taraf
Aagaya hai noor wala, noor wala aaya hai
Ho rahi hain chaar jaanib barishein anwar ki
Chha gayi nikhat gulon par har shajar ithlaya hai
Zarra zarra jagmagaya har taraf aaya nikhaar
Goya saari hi faza ko noor mein nehlaya hai
Noor wale ke rukh-e-roshan ki kya tareef ho
Chehra-e-anwar ke aage chand bhi sharmaya hai
Chhat pe Kabe ki utar kar hukm-e-Rabb-e-Pak se
Hazrat-e-Jibreel ne jhanda wahan lehraya hai
Chaar soo chhayi hui thin kufr ki tareekiyan
Tum ne aakar noor se sansaar ko chamkaya hai
Joon hi aamad maah-e-milad-e-mubarak ki hui
Ahl-e-imaan jhoom uthe shetan ko ghussa aaya hai
Jab andhere ghar mein aaye noor se ghar bhar gaya
Gumshuda sui ko Bibi Ayesha ne paya hai
Aye Khuda-e-do jahan ehsan tera hai bada
Tu ne paida un ki ummat mein humein farmaya hai
Noor wale hum gunahgaron ke ghar bhi roshni
Aa ke kar do, noor tum ne har jagah phelaaya hai
Apna jana aur hai un ka bulana hai deegar
Khush naseebi un ki jin ko Shah ne bulwaya hai
Mujh ko dhaaras hai ghulam-e-Syed-e-Abrar hoon
Maswa palle mere kuch nahi sarmaya hai
Noor wale! ab khudara muskurate aaiye
Roshni ho qabr mein haye! andhera chhaya hai
Sun le shetan tu daba sakta nahi Attar ko
Do jahan mein is pe meethe Mustafa ka saya hai