Roshan hai do aalam mein mah-e-roo-e-Muhammad
Konain hai aks-e-rukh-e-nikoo-e-Muhammad
Taban hai har ik shay mein rukh-e-pak ka jalwa
Har gul se chali aati hai khushboo-e-Muhammad
Zahir ye hua aayat-e-Allah rami se
Hai quwwat-e-Haq taqat-e-bazoo-e-Muhammad
Jab naib-o-mehboob-e-Khuda aap hi thehray
Phir kyun na ho har cheez pe qaboo-e-Muhammad
Kaabay ki taraf koi na sar apna jhukata
Jhukta na agar wo su-e-abroo-e-Muhammad
Makhlooq hai joya-e-raza-mandi-e-Khaliq
Allah Ta'ala hai raza-joo-e-Muhammad
Deti hai du'aon se to eezaon ka badla
Kya khoob hai aadat teri ae khoo-e-Muhammad