Tu ne mujh ko Hajj pe bulaya Ya Allah meri jholi bhar de
Gard-e-Kaaba khoob phiraya Ya Allah meri jholi bhar de
Maidan-e-Arafat dikhaya Ya Allah meri jholi bhar de
Bakhsh de har haaji ko Khudaya Ya Allah meri jholi bhar de
Beh Kausar-o-beer-e-Zam Zam kar de karam ae Rabb-e-Akram
Hashr ki pyaas se mujhe bachana Ya Allah meri jholi bhar de
Maula mujh ko naik bana de apni ulfat dil mein basa de
Beh Safa aur beh Marwah Ya Allah meri jholi bhar de
Ya Allah Ya Rahman Ya Hannan Ya Mannan
Bakhsh de bakhshay huon ka sadqa Ya Allah meri jholi bhar de
Wasita nabiyon ke sarwar ka wasita Siddiq aur Umar ka
Wasita Usman-o-Haidar ka Ya Allah meri jholi bhar de
Naar-e-Jahannum se tu bachana khuld-e-bareen mein mujhko basana
Ya Rab uraye Shah-e-Madina Ya Allah meri jholi bhar de
Sail hoon mein teri wala ka pher de rukh har ranj-o-bala ka
Wasita Shah-e-Karb-o-Bala ka Ya Allah meri jholi bhar de
Jis dam su-e-Taiba safar ho aankhein tar hoon phatta jigar ho
Aur ata ho sozish-e-seena Ya Allah meri jholi bhar de
Saamne jab ho Gumbad-e-Khizra qalb-o-jigar hoon para para
Beh niklein ashkon ka dhara Ya Allah meri jholi bhar de
Shah-e-Madina ki ulfat de soz de aur dard-o-riqqat de
Ishq-e-Nabi mein khoob rulana Ya Allah meri jholi bhar de
Mein hoon banda tu hai Maula tu hai qadir mein nakara
Mein mangta tu dene wala Ya Allah meri jholi bhar de
Soz-e-Uwais-o-Bilal Khuda de Ghous ka sadqa mujh ko bana de
Shah-e-Madina ka deewana Ya Allah meri jholi bhar de
Hazir dar hoon mein dukhiyara Ya Rabb! tera hi hai sahara
Ranj-o-alam ne mujh ko mara Ya Allah meri jholi bhar de
Hai tera farmaan Ud'ooni hai yeh dua ho qabr na sooni
Jalwa-e-Yaar se is ko basana Ya Allah meri jholi bhar de
De husn-e-akhlaq ki daulat kar de ata ikhlas ki nemat
Mujh ko khazana de taqwa ka Ya Allah meri jholi bhar de
Bakhsh de meri sari khatayen khol de mujh par apni atayen
Barsade rehmat ki barkha Ya Allah meri jholi bhar de
Dawate Islami ki Qayyum ek ek ghar mein mach jaye dhoom
Is pe fida ho bacha bacha Ya Allah meri jholi bhar de
Yoon mera duniya se safar ho un ki chaukhat pe mera sar ho
Pesh-e-nazar ho un ka jalwa Ya Allah meri jholi bhar de
Taj o takht o hukumat mat de kasrat-e-maal o daulat mat de
Apni raza ke de de muzday Ya Allah meri jholi bhar de
Jannat mein Aaqa ka padosi ban jaye Attar Elahi
Mola az paye Qutb-e-Madina Ya Allah meri jholi bhar de