Ya Ali-ul-Murtaza Maula Ali Mushkil Kusha
Aap hain Sheer-e-Khuda Maula Ali Mushkil Kusha
Sahib-e-lutf-o-ata Maula Ali Mushkil Kusha
Hain Shaheed-e-ba-wafa Maula Ali Mushkil Kusha
"Ilm ka main shehar hoon darwaza us ka hain Ali"
Hai ye qaul-e-Mustafa Maula Ali Mushkil Kusha
"Jis kisi ka main maula us ke maula hain Ali"
Hai ye qaul-e-Mustafa Maula Ali Mushkil Kusha
Paikar-e-khauf-e-Khuda ae Aashiq-e-Khair-ul-Wara
Tum se raazi Kibriya Maula Ali Mushkil Kusha
Ba'd khulafa-e-salasa sab sahaba se bada
Aap ko rutba mila Mawla Ali Mushkilkusha
Qala-e-Khaibar ka darwaza ukhada aap ne
Marhaba! Sad marhaba! Mawla Ali Mushkilkusha
Paikar-e-judo sakha tu main faqeer o be-nawa
Tu hai data main gada Mawla Ali Mushkilkusha
Shabbar o Shabbir ke walid ho tum maan Fatima
Sayyid o sardar ho Mawla Ali Mushkilkusha
Main gunahon ka mareez aur aap hain mere tabeeb
Deejiye mujh ko shifa Mawla Ali Mushkilkusha
Jaan ko khatra hai meri dushmano se har ghadi
Al-madad Sher-e-Khuda Mawla Ali Mushkilkusha
Haider-e-Karrar le ke aao tegh-e-Zulfiqar
Zor-e-dushman badh chala Mawla Ali Mushkilkusha
Maghfirat karwaiye jannat mein le ke jaiye
Wasita Hasnain ka Mawla Ali Mushkilkusha
Dil se duniya ki mohabbat door kar ke Ya Ali!
Deeda-e-ishq-e-Mustafa Mawla Ali Mushkilkusha
Az paye Ghous-ul-Wara hum ko Najaf bulwaiye
Ho karam Ya Murtaza Mawla Ali Mushkilkusha
Shabbar o Shabbir ke baba mujhe deedar ho
Khwab mein ab aap ka Mawla Ali Mushkilkusha
Ashkbar aankhen ata hon dil ki sakhti door ho
Deejiye khouf-e-Khuda Mawla Ali Mushkilkusha
Ek zarra apni ulfat ka inayat kar mujhe
Apna deewana bana Mawla Ali Mushkilkusha
Bheek lene ke liye darbar mein mangta tera
Le ke kashkool aa gaya Mawla Ali Mushkilkusha
Kyun phiroon dar dar bhala khairat lene ke liye
Main faqat mangta tera Mawla Ali Mushkilkusha
Nafs-e-Ammara ho maghloob aur sada nakam ho
Waar har Shaitan ka Mawla Ali Mushkilkusha
Be-sabab bakhshish ho meri yeh dua farmaiye
Mustafa ka wasita Mawla Ali Mushkilkusha
Keejiye haq se dua imaan par ho khatima
Khair se Attar ka Mawla Ali Mushkilkusha