Yaqeenan manba-e-khauf-e-Khuda Siddique-e-Akbar hain
Haqeeqi aashiq-e-khair-ul-wara Siddique-e-Akbar hain
Bila shak paikar-e-sabr-o-Raza Siddique-e-Akbar hain
Yaqeenan makhzan-e-sidq-o-wafa Siddique-e-Akbar hain
Nihayat muttaqi-o-parsa Siddique-e-Akbar hain
Taqi hain balkay Shah-e-Atqiya Siddique-e-Akbar hain
Jo yaar-e-ghaar-e-mehboob-e-Khuda Siddique-e-Akbar hain
Wahi yaar-e-mazar-e-Mustafa Siddique-e-Akbar hain
Tabeeb-e-har mareez-e-ladawa Siddique-e-Akbar hain
Ghareebon be-kason ka aasra Siddique-e-Akbar hain
Amir-ul-Momineen hain aap Imam-ul-Muslimeen hain aap
Nabi ne jannati jin ko kaha Siddique-e-Akbar hain
Sabhi as-haab se badh kar muqarrab zaat hai un ki
Rafeeq-e-sarwar-e-arz-o-sama Siddique-e-Akbar hain
Umar se bhi woh afzal hain woh Usman se bhi hain aala
Yaqeenan peshwaye Murtaza Siddique-e-Akbar hain
Imam-e-Ahmed-o-Malik, Imam-e-Abu Hanifa aur
Imam-e-Shafii ke peshwa Siddique-e-Akbar hain
Tamam Awliya-e-Allah ke sardar hain jo us
Hamare Ghous ke bhi peshwa Siddique-e-Akbar hain
Sabhi ulema-e-ummat ke, Imam-o-peshwa hain aap
Bila-shak peshwaye Asfiya Siddique-e-Akbar hain
Khudaye Pak ki rahmat se insaanon mein har ek se
Fazoon tar ba’ad az kull-e-Ambiya Siddique-e-Akbar hain
Halakat khez tughyani ho ya hon maujein toofani
Na doobay apna beera Siddiq-e-Akbar hain
Bhatak sakte nahi hum apni manzil thokaron mein hai
Nabi ka hai karam aur rehnuma Siddiq-e-Akbar hain
Gunaahon ke marz ne neem jaan hai kar diya mujh ko
Tabeeb ab bas mere to aap Ya Siddiq-e-Akbar hain
Na ghabrao gunahgaro tumhare hashr mein haami
Muhib-e-Shafi-e-Roz-e-Jaza Siddiq-e-Akbar hain
Na dar Attar aafat se Khuda ki khaas rehmat se
Nabi wali tere, mushkilkusha Siddiq-e-Akbar hain