Zarrey zarrey pe chhaya hua noor hai, mere meethe Madine ki kya baat hai
Noor se sab faza is ki mamoor hai, mere meethe Madine ki kya baat hai
Noor phoolon mein hai noor kaliyon mein hai, noor bazaar mein noor galiyon mein hai
Dasht-o-kohsar par noor hi noor hai, mere meethe Madine ki kya baat hai
Har taraf rehmaton ki chhayi ghata, mehki mehki hai kya khoob Madani faza
Zarrey zarrey pe qurbaan yahan Toor hai, mere meethe Madine ki kya baat hai
Kya yahan Dasht-e-Taiba ki hoon khubiyan, phool to phool kaante bhi dilkash yahan
Pattey pattey pe chhaya hua noor hai, mere meethe Madine ki kya baat hai
Kaif-o-masti mein doobey hue raat din, bheeni khushbu se mehkey hue raat din
Jis ko dekho yahan aake masroor hai, mere meethe Madine ki kya baat hai
Bagh-e-Taiba mein rehti hai har dam bahar, aake dekho yahan ka samaan khushgawar
Sab faza is ki khushbu se bharpoor hai, mere meethe Madine ki kya baat hai
Gham zada jo bhi darbar mein aagaya, Shah ki woh nigah-e-karam paagaya
Sara ranj-o-alam is ka kafoor hai, mere meethe Madine ki kya baat hai
Dekho Taiba ko kaisi fazeelat mili, Qabr-e-Anwar isi mein banai gayi
Gumbad-e-sabz har aankh ka noor hai, mere meethe Madine ki kya baat hai
Sabz gumbad ke jalwon pe qurbaan jaan, balkay qurbaan hai husn-e-kon-o-makan
Har minar pe chhaya hua noor hai, mere meethe Madine ki kya baat hai
Khaak-e-Taiba mein rakhi hai Rabb ne shifa, sari bimariyon ki hai is mein dawa
Is ki barkat se har ek marz door hai, mere meethe Madine ki kya baat hai
Aas mujh ko tumhare karam ki Shah-a, bheek de do mujhe apne gham ki Shah-a
Keh do Aqa! teri arz manzoor hai, mere meethe Madine ki kya baat hai
Phir karam is pe Sarkar ka hogaya, bakht bedaar Attar ka hogaya
Rubaru Rauza-e-Pak ka noor hai, mere meethe Madine ki kya baat hai